Huku zikiwa zimesalia siku chache kabla ya Watanzania kuelekea kwenye masanduku ya kura kwa ajili ya Uchaguzi Mkuu uliopangwa kufanyika Oktoba 29, 2025, mgombea urais kupitia Chama Cha Mapinduzi (CCM), Dk. Samia Suluhu Hassan, amemwaga ahadi nzito kwa wakazi wa Jiji la Dar es Salaam. Akizungumza leo, Oktoba 21, 2025, mbele ya umati uliofurika kwenye mkutano wa kampeni, Dk. Samia aliweka bayana mikakati kabambe ya serikali yake ya miaka mitano ijayo, akilenga kutatua kero mbili sugu zinazolikabili jiji hilo la kibiashara: msongamano wa magari na mafuriko.
Akijibu kilio cha muda mrefu cha Wanadar es Salaam kuhusu kupoteza saa nyingi kwenye foleni, Dk. Samia aliahidi mradi mkubwa wa ujenzi wa barabara za juu (Flyover) tano mpya. Alisema endapo atapata ridhaa ya kuongoza, serikali yake itahakikisha inajenga 'flyover' katika makutano makuu yanayosababisha mrundikano mkubwa wa magari. Aliyataja makutano hayo kuwa ni yale ya Mwenge, makutano ya Morocco, eneo la Magomeni, pamoja na makutano ya barabara za Ali Hassan Mwinyi na ile ya Umoja wa Mataifa (United Nation).
Lengo la miradi hiyo, alisema, ni kuongeza ufanisi katika usafiri, kupunguza muda wa safari, na hivyo kukuza kwa kasi shughuli za kiuchumi na kijamii jijini Dar es Salaam.
Sambamba na vita dhidi ya foleni, Dk. Samia pia alitangaza mkakati kabambe wa kukabiliana na changamoto ya mafuriko, ambayo imekuwa ikigeuza maeneo mengi ya jiji kuwa "visiwa" kila msimu wa mvua kubwa. Aliahidi kuwa serikali yake itashughulikia maeneo korofi, ikiwemo kingo za Mto Mbezi, Mto China, na Mto Gide.
Alibainisha kuwa mradi wa Uendelezaji wa Jiji la Dar es Salaam (Dar es Salaam Metropolitan Development Project – DMDP) awamu ya pili, ndiyo utakaotumika kutekeleza mpango huo. Aliongeza kuwa katika utekelezaji huo, mifereji mikubwa ya kupitisha maji ya mvua itajengwa na kukamilishwa katika maeneo ya Tandale, Magomeni, na Makumbusho, ili kuondoa kabisa adha hiyo kwa wakazi wa Manispaa ya Kinondoni na maeneo jirani.
Dk. Samia hakuishia hapo, alitaja miradi mingine mahususi ya barabara itakayotekelezwa ndani ya miaka mitano ijayo iwapo atachaguliwa. Aliahidi kukamilisha ujenzi wa barabara muhimu ya Kimara-Mavurunza-Bunyokwa-Kinyerezi, yenye urefu wa kilomita 7, akisisitiza umuhimu wake katika kuunganisha majimbo matatu ya Segerea, Kibamba, na Ubungo.
Aidha, alitangaza mipango mipya ya upanuzi wa barabara, ikiwemo upanuzi wa barabara ya Mwai Kibaki kuanzia Morocco hadi Kawe (kilomita 9) na barabara ya Garden (Garden road). Ahadi nyingine iliyotolewa ni ujenzi wa barabara ya Tegeta kuelekea Bagamoyo (kilomita 57) na kukamilisha sehemu ya barabara ya Kibamba-Mloganzila, hasa kipande cha kilomita 8 kutoka Mloganzila hadi Mloganzila Citizen.
Ahadi hizi zote zinalenga kuendeleza mabadiliko makubwa ya miundombinu katika jiji hilo ambalo ni kitovu cha biashara cha Tanzania.