Akiwa katika harakati za kuwania kiti cha urais wa Jamhuri ya Muungano wa Tanzania, mgombea kupitia Chama cha Ukombozi wa Umma (CHAUMMA), Salum Mwalimu, ameweka bayana dira yake ya kuusambaza uchumi nchi nzima. Akihutubia wakazi wa Uyole mkoani Mbeya, ametoa ahadi kabambe ya kuubadilisha mji huo na kuufanya kuwa kitovu kikuu cha kimkakati kwa ajili ya biashara za kimataifa.
Mwalimu alieleza kuwa mpango wake unalenga kutumia eneo la kimkakati la Mbeya, ambalo linapakana na nchi jirani, ili kujenga kituo cha kisasa cha kibiashara kitakachovutia wafanyabiashara kutoka mataifa mengine. Alisema hatua hii itapunguza ulazima kwa wafanyabiashara wa kimataifa au hata wale wa mikoa ya Nyanda za Juu Kusini kusafiri umbali mrefu hadi Dar es Salaam kutafuta bidhaa na huduma. "Tukijenga hapa kituo imara, mfanyabiashara kutoka nchi jirani hataona sababu ya kwenda hadi Dar es Salaam. Atakuja hapa, na kwa kufanya hivyo, tutafungua milango mingi ya fursa za kiuchumi kwa wana-Mbeya na Watanzania kwa ujumla," alieleza Mwalimu.
Akifafanua zaidi, mgombea huyo alisema sera yake inalenga kumaliza dhana ya maendeleo kubanana katika jiji moja. Aliahidi kuwa serikali yake itahakikisha utajiri, miundombinu ya kisasa kama magorofa, na hata maeneo ya starehe vinajengwa katika kila pembe ya nchi. "Tunataka tutengeneze matajiri kila mkoa. Magorofa yanayojengwa Dar es Salaam yajengwe na huku. Maisha mazuri yasiwe anasa ya wachache mijini. Kwa lugha rahisi, tunataka bata liliwe kila kona ya Tanzania," alisisitiza huku akishangiliwa na umati.
Ahadi hii imetolewa wakati kampeni za uchaguzi mkuu unaotarajiwa kufanyika Oktoba 29 mwaka huu zikizidi kushika kasi, huku wagombea wakijaribu kuonyesha namna watakavyotatua changamoto za kiuchumi na kuleta maendeleo yenye mguso wa moja kwa moja kwa wananchi.