Chama cha ACT Wazalendo kimeorodhesha mambo muhimu ambayo, yakitekelezwa na serikali pamoja na Tume Huru ya Uchaguzi (INEC), yanaweza kuleta hali ya kuaminiana miongoni mwa wadau wote wa uchaguzi kuelekea Uchaguzi Mkuu wa mwaka 2025. Haya yameelezwa katika taarifa iliyotolewa na Naibu Katibu wa Habari, Uenezi na Mahusiano na Umma wa chama hicho, Shangwe Ayo, kwa vyombo vya habari.
Makamu Mwenyekiti wa ACT Wazalendo Bara, Isihaka Mchinjita, alipokuwa akizungumza katika Kongamano la Tatu la Operesheni Linda Demokrasia, lililofanyika Kigoma, alieleza kuwa chama hicho kina masharti sita muhimu.
Kwanza, ni lazima wajumbe wa sasa wa INEC waondolewe na wajumbe wapya wateuliwe kwa kufuata sheria ya Tume Huru ya Uchaguzi. Hii inajumuisha kutangaza nafasi hizo wazi na kufanya usaili kwa Watanzania wenye sifa ili kuwapa nafasi ya kuwa makamishna wa tume.
Pili, Mchinjita alisisitiza kuwa vyombo vya ulinzi na usalama vinapaswa kujiepusha na vitendo vya kupora uchaguzi. Alidai kuwa uzoefu kutoka Uchaguzi wa Serikali za Mitaa 2019, Uchaguzi Mkuu 2020, na Uchaguzi wa Serikali za Mitaa 2024 umeonyesha kuwa vyombo vya dola, kama vile Jeshi la Polisi na Idara ya Usalama wa Taifa, vimehusika katika wizi wa kura.
Tatu, ACT Wazalendo inasisitiza kuwa Wakurugenzi wa Halmashauri wasiwe wasimamizi wa uchaguzi. Wanataka INEC ihakikishe kuwa mchakato wa uteuzi wa wasimamizi wa uchaguzi hauwahusishi Wakurugenzi hao, ambao wanadaiwa kuwa makada wa Chama cha Mapinduzi (CCM).
Nne, hatua madhubuti zinapaswa kuchukuliwa ili kudhibiti kura feki katika mchakato wa uchaguzi. Wanataka kuwe na uwazi na ushirikishwaji katika uzalishaji, usambazaji, na udhibiti wa karatasi za kupigia kura.
Tano, mawakala wawe huru katika vituo vya kupigia kura. Mchakato wa kupata, kuapisha, na kuwepo kwa mawakala lazima uzingatie maslahi ya wagombea, pamoja na kuwapa mawakala nakala za matokeo. Pia, mawakala wasiondolewe kwenye vituo vya kupigia kura.
Sita, wagombea wasienguliwe kwa makosa madogo. INEC inapaswa kuweka utaratibu wa kurekebisha makosa ya kiuandishi katika fomu za wagombea badala ya kuwaengua wagombea wa upinzani pekee.
Kwa upande wa Zanzibar, Mchinjita alitaja masuala muhimu kama vile kuondolewa kwa kura ya mapema, kuondolewa kwa Mkurugenzi wa ZEC na sekretarieti yake, na uandikishaji wa wapigakura bila ubaguzi.
Mchinjita alieleza kuwa hoja hizi zitawasilishwa katika majadiliano yanayoendelea kupitia Kituo cha Demokrasia (TCD) na kwamba chama kinasisitiza kufutwa kwa Uchaguzi wa Serikali za Mitaa 2024 na kufanywa upya pamoja na Uchaguzi Mkuu 2025.
Aliongeza kuwa Operesheni Linda Demokrasia inalenga kurejesha thamani ya kura ya kila Mtanzania, na kwamba ACT Wazalendo inaendelea kuwahamasisha wananchi kupigania haki yao ya kupiga kura.
ACT Wazalendo inaendelea na makongamano ya viongozi wa ngazi za chini ili kufafanua msimamo wa chama kuelekea Uchaguzi Mkuu 2025. Kongamano la Kigoma ni la tatu, baada ya makongamano ya Dar es Salaam na Lindi. Kongamano la nne litafanyika Songwe Aprili 12, 2025.