Chama cha Upinzani cha ACT Wazalendo kimeadhimisha miaka 11 tangu kuanzishwa kwake kwa kishindo, huku Kiongozi Mkuu wa Chama hicho, Dorothy Semu, akikitangaza kuwa ndiyo jukwaa mbadala, imara na la kuaminika pekee kwa Watanzania wote, Bara na Zanzibar, katika harakati za kuleta ukombozi wa kweli wa kiuchumi, kijamii na kisiasa. Maadhimisho haya yamekuwa jukwaa la kuonesha nguvu ya chama hicho na maandalizi yake kuelekea Uchaguzi Mkuu ujao.
Akihutubia maelfu ya wanachama na wafuasi waliofurika kwenye Ukumbi wa Hakainde Hichilema, Makao Makuu ya Chama jijini Dar es Salaam, Bi. Semu amesema licha ya kupitia changamoto nyingi tangu kuanzishwa kwake, ikiwemo mikikimikiki ya kisiasa, ACT Wazalendo imepiga hatua kubwa na sasa inajivunia kuwa chama kinachokua kwa kasi zaidi nchini. Amefafanua kuwa chama hicho kimejijengea heshima kutokana na msimamo wake na namna kinavyoshiriki katika siasa za kitaifa.
Akitaja mafanikio makubwa kumi yaliyofikiwa katika muongo mmoja uliopita, Kiongozi huyo ametaja chama hicho kuongoza katika siasa za hoja zenye tija badala ya matusi au uhasama usio na msingi, kujenga jukwaa safi la wanasiasa makini wanaojali maslahi ya umma badala ya matumbo yao, kuamini na kuwekeza kwa vijana kama nguzo ya taifa la kesho, kuendeleza mapambano ya ukombozi wa wanawake na kuwawezesha kushiriki kikamilifu katika siasa na maendeleo, kuwa sauti ya matumaini na mwakilishi wa makundi mbalimbali yenye changamoto katika jamii, na kujisimamia kama chombo kinara cha kupigania haki za binadamu, utawala wa sheria na demokrasia ya kweli.
Akigeukia Uchaguzi Mkuu wa mwaka 2025, Bi. Semu amesisitiza kuwa mwaka huo ni wa kipekee na wenye umuhimu wa kihistoria kwa mustakabali wa taifa. Amesema chama hicho kimejiandaa kikamilifu kushiriki katika uchaguzi huo mkuu kwa nguvu zake zote. Ameeleza kuwa uamuzi wa kushiriki si wa kawaida, bali ni wa kimkakati wenye lengo la kulinda thamani ya kila kura ya Mtanzania, kukataa kabisa udikteta wa aina yoyote katika mifumo ya utawala na uchaguzi, na kuonesha utayari wao wa kuiongoza nchi baada ya Chama Cha Mapinduzi kushindwa kwa zaidi ya miongo sita sasa kuleta maendeleo ya kweli, usawa na haki yanayokidhi matarajio ya wananchi.
Kuelekea uchaguzi huo, Kiongozi huyo ameweka bayana majukumu makuu matatu ya ACT Wazalendo: Kwanza, ni kupigania kwa nguvu zote malengo na Ilani ya Uchaguzi ya chama chao, inayobeba dira ya ukombozi. Pili, ni kupigania maboresho ya kweli ya mfumo mzima wa uchaguzi ili uwe huru, wa haki na wa kuaminika, ukitoa fursa sawa kwa wote. Tatu, ni kuendelea na jukumu lao la kuunganisha taifa na kuleta maridhiano ya kisiasa na kijamii kwa maslahi mapana ya nchi.
Bi. Semu amewataka wanachama na wafuasi wa chama hicho wasitetereke katika mapambano, bali wasimame imara na kuamini katika nguvu ya umma, hususan kwa upande wa Zanzibar, ambako amedai kuwa wananchi wengi wamechoka na utawala wa sasa wa Rais Dkt. Hussein Ali Mwinyi na Chama Cha Mapinduzi, na wanatamani mabadiliko ya kweli.
Akisisitiza umuhimu wa uchaguzi huru na wa haki kama msingi wa demokrasia na utulivu wa nchi, Kiongozi huyo ameorodhesha madai sita ya msingi ambayo chama chake kitapaza sauti hadi yatekelezwe na mamlaka husika: Kuondolewa kabisa kwa Wakurugenzi wa Halmashauri za Wilaya na Miji kama wasimamizi wa uchaguzi katika maeneo yao kutokana na malalamiko ya upendeleo; Uteuzi mpya wa Tume ya Taifa ya Uchaguzi (NEC) na Tume ya Uchaguzi Zanzibar (ZEC) kwa njia shirikishi na inayojenga imani kwa wadau wote; Kudhibiti kikamilifu vitendo vya wizi wa kura au upigaji wa kura haramu ambao hudhoofisha matokeo; Kuepuka kuenguliwa kiholela kwa wagombea wa vyama vya upinzani bila kufuata sheria na taratibu stahiki; Kuhakikisha uhuru kamili wa mawakala wa vyama vya siasa vituoni kuweza kulinda kura; na Kuzuia vyombo vya dola kuingilia mchakato wa uchaguzi kwa namna yoyote inayoathiri uhuru na haki.
Katika kuhitimisha hotuba yake iliyopokewa kwa shangwe, Bi. Semu ametoa wito maalum na mzito kwa Rais wa Jamhuri ya Muungano wa Tanzania, Mheshimiwa Samia Suluhu Hassan, kuisikiliza kwa makini sauti ya viongozi wa dini mbalimbali nchini na wito wa haki unaotolewa na wadau mbalimbali wa siasa na jamii, akisema kwamba hilo ndilo suluhisho la pekee la kulinusuru taifa na kuelekea Uchaguzi Mkuu wa 2025 ulio salama, wa amani na unaokubalika na wote. Amesema ACT Wazalendo itaendelea kujenga na kuimarisha jukwaa la ukombozi, kwa ajili ya kujenga Tanzania na Zanzibar yenye mamlaka kamili, demokrasia ya kweli, na ustawi kwa wananchi wote bila ubaguzi.