Kwa mwaka wa pili mfululizo, Taasisi ya Utafiti wa Mifugo Tanzania (TALIRI) imethibitisha ubora wake kwa kuibuka mshindi wa kwanza katika kundi la Taasisi za Umma zinazotoa Mafunzo na Utafiti. Ushindi huu mtamu ulitangazwa wakati wa kilele cha maonesho ya kimataifa ya kilimo ya Nanenane, ambapo tuzo hiyo ilikabidhiwa na mgeni rasmi, Rais wa Jamhuri ya Muungano wa Tanzania, Mheshimiwa Dk. Samia Suluhu Hassan, mnamo tarehe 8 Agosti 2025.
Akizungumzia ushindi huo, Mkurugenzi Mkuu wa TALIRI, Profesa Erick Vitus Komba, alisema siri ya mafanikio yao ni kujikita katika kufanya tafiti zinazoleta suluhisho la moja kwa moja kwa changamoto za wafugaji na kuja na teknolojia za kisasa. Alieleza kuwa katika banda lao, walionyesha teknolojia mbalimbali ambazo zimevutia maelfu ya wananchi na viongozi, ikiwemo teknolojia ya kuku wa asili walioboreshwa aina ya "Horasi."
"Tulimwonyesha Mheshimiwa Rais teknolojia yetu ya kuku aina ya Horasi. Hawa ni kuku wa asili ambao tumewafanyia uchaguzi maalum ili kupata kizazi chenye uwezo wa kukua haraka na kutaga mayai mengi zaidi kuliko kuku wengine wa kienyeji," alifafanua Prof. Komba. Teknolojia hii inalenga kumwongezea kipato mfugaji mdogo bila kuachana na ladha na uhimilivu wa kuku wa asili.
Mbali na kuku wa Horasi, Prof. Komba alitaja teknolojia nyingine zilizochangia ushindi huo kuwa ni pamoja na utafiti wa kina wa malisho uliopelekea kusajiliwa kwa aina tano mpya za mbegu za malisho. Vilevile, walionyesha mbinu za kisasa za utayarishaji na uhifadhi wa malisho kwa njia ya vundiko (silage) na utengenezaji wa marobota, teknolojia muhimu inayohakikisha mifugo inapata chakula bora hata wakati wa kiangazi.
"Tunamshukuru sana Rais wetu, Dk. Samia Suluhu Hassan, kwa kutambua na kuthamini kazi yetu. Tuzo hii inatupa nguvu ya kuendelea kutekeleza majukumu yetu kwa ufanisi zaidi, tukishirikiana na wafugaji na wadau wote ili kuleta mapinduzi katika sekta ya mifugo nchini," alihitimisha Prof. Komba. Ushindi huu wa TALIRI ni ishara tosha ya maendeleo yanayopatikana katika eneo la utafiti wa kilimo na mifugo nchini.