Serikali ya Uingereza imeomba kampuni ya Apple kuruhusu ufikiaji wa data iliyosimbwa (encrypted) kwenye huduma ya iCloud kwa watumiaji wake, endapo kutakuwa na tishio la usalama wa taifa. Hata hivyo, wachambuzi wanaona uwezekano mdogo wa Apple kukubali ombi hilo, kwani hakuna kampuni kubwa ya teknolojia (Big Tech) iliyowahi kuridhia maombi kama hayo.
Kwa mujibu wa ripoti ya BBC iliyochapishwa tarehe 7 Februari, Wizara ya Mambo ya Ndani ya Uingereza ilitoa ombi hilo kwa Apple kwa mujibu wa sheria ya mamlaka za uchunguzi, inayolazimisha kampuni kushirikiana na vyombo vya sheria.
Apple inalinda data ya watumiaji kupitia huduma yake ya usimbaji inayoitwa Advanced Data Protection (ADP), ambayo inahakikisha kwamba hata kampuni yenyewe haiwezi kufikia taarifa zilizohifadhiwa. Ingawa huduma hii ni hiari kwa watumiaji wa iCloud, idadi ya waliyochagua kuitumia haijulikani.
Hadi sasa, kampuni kama Apple zimekuwa zikikataa maombi kutoka kwa serikali za Magharibi yanayolenga kupata ufikiaji wa data iliyosimbwa. Katika ombi hili la Uingereza, BBC inaripoti kuwa lengo lilikuwa si kupata data ya watumiaji wote, bali kufikia taarifa za watumiaji waliotajwa kuwa tishio kwa usalama wa taifa.
Serikali ya Uingereza haikuthibitisha wala kukanusha ripoti hiyo, huku Apple nayo ikiepuka kutoa maoni rasmi.
Mashirika ya kutetea haki za faragha yamekosoa hatua hii, yakiitaja kuwa ni ukiukwaji mkubwa wa faragha ya watu. Caroline Wilson Palow, mkuu wa sheria wa shirika la Privacy International, alisema: "Hili ni jambo ambalo Uingereza haipaswi kufanya. Ni hatua hatari ambayo inaweza kuweka msingi mbaya na kuhamasisha tawala zinazokiuka haki za binadamu duniani kutumia mbinu hii kwa mabaya."
Kulingana na BBC, Apple imewahi kusema kuwa endapo italazimishwa kukubali ombi kama hili, inaweza kuamua kuondoa huduma ya Advanced Data Protection kutoka kwenye soko la Uingereza kabisa.
Hali kama hii iliwahi kutokea mwaka 2016, wakati mahakama ya Marekani ilipotaka Apple kusaidia kufungua simu ya mshukiwa wa tukio la ufyatuaji risasi. Apple ilikataa ombi hilo, lakini hatimaye Shirika la Upelelezi la Marekani (FBI) liliweza kufikia data hiyo bila msaada wa Apple.