Kampuni ya Meta, inayoimiliki mitandao ya Facebook, Instagram na WhatsApp, imetangaza mpango kabambe wa kujenga vituo kadhaa vya data vyenye ukubwa na uwezo usiowahi kushuhudiwa, ikiwa ni sehemu ya maandalizi ya kile kinachoitwa enzi ya 'Akili Kuu' (superintelligence).
Akitoa tangazo hilo kupitia ukurasa wake wa mtandao wa Threads, Mkurugenzi Mtendaji wa Meta, Mark Zuckerberg, alifichua kuwa kampuni yake inawekeza mamia ya mabilioni ya dola katika miundombinu hii ya kimapinduzi. Lengo kuu ni kutengeneza Akili Mnemba (AI) yenye uwezo na akili inayopita mbali sana ule wa binadamu.
Vituo vya data ni miundombinu muhimu inayohifadhi maelfu ya kompyuta (seva) na vifaa vya mawasiliano vinavyotumika kuendesha mifumo ya AI. Hata hivyo, miradi hii mipya ya Meta ipo katika kiwango tofauti kabisa.
Zuckerberg alitangaza kuwa kituo cha kwanza, kiitwacho 'Prometheus', kitaanza kufanya kazi mwaka ujao. Kituo hiki kitakuwa na uwezo wa kutumia umeme wa kiwango cha Gigawati (GW), kiasi cha nishati kinacholingana na kile kinachozalishwa na kinu kizima cha nyuklia. Hii ni hatua kubwa sana ukilinganisha na vituo vingi vya data vilivyopo sasa ambavyo hutumia umeme wa kiwango cha Megawati (MW). Kwa sababu ya matumizi haya makubwa ya nishati, vituo vya data hupewa jina la utani la 'wanyama wanaokula umeme'.
Mbali na Prometheus, Zuckerberg alifichua kuwepo kwa mradi mwingine, 'Hyperion', ambao unatarajiwa kupanuliwa hadi kufikia uwezo wa Gigawati 5 katika miaka ijayo. Aliongeza kuwa wanajenga pia 'Titan Clusters' kadhaa, ambapo kimoja tu kitakuwa na ukubwa unaokaribia eneo lote la kisiwa cha Manhattan nchini Marekani.
"Tutakuwa kampuni ya kwanza kumiliki 'supercluster' yenye uwezo wa zaidi ya Gigawati 1," alisema Zuckerberg, akimnukuu mchambuzi wa kampuni ya utafiti ya SemiAnalysis. Alisisitiza kuwa Meta ina uwezo wa kifedha kutekeleza uwekezaji huu wa mamia ya mabilioni ya dola ili kufikia lengo lao la kujenga 'Akili Kuu'.
Licha ya kutangaza mipango hii mikubwa, Meta haijaweka wazi idadi kamili ya vituo hivyo vipya au maeneo mahususi vinapojengwa.