Wanasayansi wameleta habari mpya kuhusu kimondo kikubwa cha '2024 YR4', ambacho hapo awali kiliibua hofu kuwa kingeweza kuigonga sayari yetu ya Dunia ifikapo mwaka 2032. Matokeo ya uchambuzi wa hivi karibuni yanaonesha kuwa, ingawa Dunia iko salama, sasa hatari hiyo imehamia kwa jirani yetu wa karibu, Mwezi. Hali hii inazua maswali mapya kuhusu athari zake kwa Dunia.
Kimondo cha '2024 YR4', kilichogunduliwa Desemba mwaka jana, kina ukubwa unaokadiriwa kuwa kati ya mita 53 na 67 kwa upana. Ukubwa huu ni wa kutosha kusababisha maafa makubwa endapo kingeigonga Dunia. Hata hivyo, Shirika la Anga za Juu la Marekani (NASA) limethibitisha kuwa uwezekano wa kimondo hiki kuigonga Dunia umeshuka na sasa ni karibu na sifuri, na hivyo kuondoa wasiwasi wa awali.
Badala yake, utafiti mpya uliochapishwa na wataalamu kutoka Chuo Kikuu cha Western Ontario nchini Canada, unaonesha sura tofauti ya matukio. Ingawa utafiti huu bado haujapitiwa na wanasayansi wengine (peer review), matokeo yake ya awali yanaonesha kuna uwezekano wa asilimia 4.3% kwa kimondo cha '2024 YR4' kuupiga Mwezi.
Watafiti hao walitumia data kutoka darubini ya anga ya James Webb kuendesha masimulizi ya kompyuta (simulations) ili kubaini kitakachotokea. Matokeo yao yanaonyesha kuwa mgongano huo ungekuwa na nguvu sawa na mlipuko mkubwa wa bomu la nyuklia. Mgongano ungechimba shimo (crater) lenye kipenyo cha takriban kilomita moja kwenye uso wa Mwezi na kurusha mamilioni ya vipande vya miamba angani.
Vipande hivi vya miamba, vyenye ukubwa kuanzia milimita hadi sentimita, vingeelekea upande wa Dunia vikiwa kwenye kasi ya maelfu ya mita kwa sekunde, sawa na risasi. Hata hivyo, hakuna haja ya kuwa na hofu kwa maisha ya binadamu duniani. Watafiti wanaeleza kuwa vipande vingi vya miamba hiyo vitaungua na kusambaratika vitakapoingia kwenye angahewa la Dunia.
Athari kubwa zaidi itakuwa kwa vyombo vya angani. Vipande hivyo vya miamba vinaweza kuwa tishio kubwa kwa satelaiti, vyombo vya anga, na wanaanga wanaozunguka Dunia. Aidha, tukio hili linaweza kusababisha tukio la kuvutia la ‘mvua ya vimondo’ (meteor shower) angani, ambapo watu wangeweza kushuhudia mianga mingi mizuri usiku.
Utafiti huu unasisitiza umuhimu wa mashirika ya anga kama NASA kupanua wigo wao wa ulinzi wa sayari. Badala ya kuangalia tu vitu vinavyoweza kuigonga Dunia, sasa kuna haja ya kufuatilia pia vitisho vinavyoweza kuathiri Mwezi, kwani madhara yake yanaweza pia kutufikia kwa njia isiyo ya moja kwa moja. Kwa sasa, '2024 YR4' bado kiko mbali sana, na wanasayansi wanatarajia kupata picha kamili zaidi kuhusu ukubwa na mwelekeo wake ifikapo mwaka 2028.