Teknolojia mpya ya kisayansi inayoruhusu watafiti kubadilisha vinasaba (jeni) vya wanyama imeanza kushika kasi duniani, ikileta matumaini makubwa na wakati huo huo, mjadala mzito wa kimaadili. Kwa kutumia mbinu iitwayo CRISPR, ambayo hufanya kazi kama "mkasi wa kijeni," wanasayansi sasa wanaweza kukata na kurekebisha chembe za urithi (DNA) ili kuwapa wanyama sifa maalum, kama vile kuongeza kasi ya farasi au uzalishaji wa nyama kwa kondoo.
Nchini Ajentina, taasisi ya utafiti ya Chiron Biotech ilizua gumzo baada ya kutumia teknolojia hii kuunda farasi watano wenye kasi zaidi kwa ajili ya mchezo wa polo. Walirekebisha jeni inayodhibiti ukuaji wa misuli, lakini hatua hiyo ilizua ukosoaji mkubwa, na Chama cha Polo cha Ajentina kikapiga marufuku farasi hao kushiriki mashindano.
Wakati huo huo, nchini Marekani, kampuni ya Acceligen inatumia CRISPR kutatua changamoto za ufugaji zinazoletwa na mabadiliko ya tabianchi. Wamefanikiwa kuunda ng'ombe aina ya 'PRLR-SLICK' wenye manyoya mafupi na laini, jambo linalowafanya wastahimili zaidi joto kali. Kampuni hiyo inasema ng'ombe hawa watasaidia kuongeza upatikanaji wa nyama na maziwa duniani kote, hasa katika maeneo yenye joto. Mamlaka ya Chakula na Dawa ya Marekani (FDA) tayari imeruhusu nyama ya ng'ombe hawa kuliwa na binadamu tangu mwaka 2022.
Teknolojia hii haijaishia hapo. Watafiti nchini India wamefanikiwa kuunda kondoo wenye misuli mikubwa zaidi ili kuongeza uzalishaji wa nyama. Nayo kampuni ya Genus ya Uingereza imebuni nguruwe wasioshambuliwa na virusi hatari vya PRRS vinavyoua watoto wa nguruwe, na wanatarajiwa kuingia sokoni Marekani mwaka 2026. Kampuni nyingine ya Marekani, Revivicor, imebuni nguruwe aina ya 'GalSafe' ambao nyama yao haisababishi mzio kwa baadhi ya watu, na hata wanaangalia uwezekano wa kutumia viungo vyao kwa ajili ya upandikizaji kwa binadamu.
Pamoja na mafanikio haya ya kisayansi, maswali mazito ya kimaadili yanaibuka. Je, mabadiliko haya ya kijeni yanaweza kuwa na madhara yasiyotarajiwa kwa afya ya wanyama wenyewe au binadamu wanaokula nyama zao? Kuna hofu pia kwamba endapo wanyama hawa waliobadilishwa vinasaba wataingia porini na kuzaana na wanyama wa asili, wanaweza kueneza jeni hizo na kuharibu mfumo mzima wa ekolojia. Kama alivyosema Profesa Jeantine Lunshof wa Chuo Kikuu cha Harvard, "Swali la msingi ni hili: ni wanyama gani tunapaswa kuwabadilisha, na kwa malengo gani?"