Kisa cha kutisha nchini China kinatoa somo muhimu kuhusu hatari za kiafya zinazoweza kutokana na mila na desturi za kitamaduni za ulaji. Familia moja katika jimbo la Guangdong ilijikuta ikilazwa hospitalini baada ya kula kifuko cha mimba, au ‘plasenta’ ya kondoo, wakiamini kuwa ni lishe bora na dawa ya asili.
Mama mmoja, aliyetambulika kwa jina la Zhang, aliamua kupika kifuko hicho kama chakula, akishirikiana na dada yake pamoja na shemeji yake. Baada ya mlo huo, Zhang alianza kusumbuliwa na homa kali na kupoteza uzito wa kilo tano kwa ghafla. Baada ya uchunguzi wa kimatibabu, iligundulika kuwa wote watatu wameambukizwa ugonjwa wa ‘Brucellosis’. Ugonjwa huu hatari husababishwa na bakteria wanaopatikana kwa wanyama wa kufugwa kama ng'ombe, nguruwe, na kondoo. Maambukizi kwa binadamu hutokea pale mtu anapokunywa maziwa ambayo hayajachemshwa vizuri au anakula nyama ambayo haijaiva vya kutosha.
Kifuko cha mimba kimekuwa kikitumiwa kwa muda mrefu katika matibabu ya jadi ya Kichina (Traditional Chinese Medicine - TCM) kwa kudaiwa kuongeza kinga ya mwili, kutibu utasa, na kurejesha nguvu. Tofauti na hapo awali ambapo kifuko cha binadamu kilitumika, serikali ya China ilipiga marufuku biashara hiyo mwaka 2005 kutokana na hofu za kiafya. Hili lilichangia soko kugeukia vifuko vya mimba vya wanyama kama kondoo na ng’ombe. Hata hivyo, licha ya marufuku hiyo, biashara haramu ya vifuko vya binadamu bado inaendelea kwa siri, na imesababisha sintofahamu kubwa nchini humo.
Tukio hili limeibua mijadala mikali mtandaoni, huku wengi wakikosoa desturi za ulaji ambazo hazizingatii afya na usalama wa chakula. Hali hii inaweza kufananishwa na baadhi ya mila za vyakula nchini Tanzania ambapo baadhi ya watu wanaweza kutumia viungo au vyakula vya asili bila kujua hatari zake za kiafya. Ni muhimu sana kwa jamii kuongeza uelewa kuhusu usalama wa chakula na kuacha mila zinazoweza kuhatarisha maisha yao. Kuwa makini na chanzo cha chakula na jinsi kinavyotayarishwa ni jambo la msingi ili kuepuka magonjwa hatari.