Uwekezaji wa Serikali ya Tanzania katika teknolojia ya kukabiliana na majanga umeanza kuzaa matunda kimataifa, baada ya nchi za Ghana, Togo, na Burkina Faso kutuma wataalamu wao nchini kujifunza jinsi Kituo cha Ufuatiliaji wa Majanga na Tahadhari ya Mapema (Situation Room) kinavyofanya kazi.
Hatua hii inaifanya Tanzania kuwa shule na kiongozi katika eneo la usimamizi na menejimenti ya maafa barani Afrika, ikionyesha umahiri wake katika kutumia mifumo ya kisasa kuokoa maisha na mali za wananchi wake.
Akizungumza wakati wa ufunguzi wa mafunzo ya siku tatu kwa wataalamu hao yanayofanyika katika Mji wa Serikali Mtumba, jijini Dodoma, Mkurugenzi wa Idara ya Menejimenti ya Maafa (Ofisi ya Waziri Mkuu), Brigedia Jenerali Hosea Ndagala, alisema mafanikio ya kituo hicho yanatokana na mfumo wake wa kipekee.
"Siri ya mafanikio yetu ni ushirikiano. Kituo hiki kina wataalamu kutoka taasisi mbalimbali za serikali kama hali ya hewa, maji, na kilimo, ambao wanakaa pamoja, wanachakata taarifa kwa pamoja na kutoa tahadhari moja yenye nguvu na kwa wakati," alifafanua Brigedia Jenerali Ndagala.
Umahiri huu umewavutia wageni hao, ambao wameonesha nia ya dhati ya kuiga mfumo huo. Mkurugenzi Msaidizi wa kituo hicho, Jane Kikunya, alisema wataalamu hao wamevutiwa hasa na jinsi mfumo wa Tanzania unavyofikisha taarifa na tahadhari hadi ngazi za vijiji.
"Wamekuja Tanzania kubadilishana uzoefu kwa sababu mnafanya vizuri," alisema Simboou Akleso, mmoja wa washiriki kutoka Togo. "Tumeshuhudia kwa macho jinsi taarifa zinavyokusanywa kutoka vyanzo mbalimbali, zinavyochakatwa na kuwasilishwa kwa umma. Huu ni mfumo wa kuigwa."
Kituo hiki cha kisasa kinathibitisha kuwa Tanzania haijiandai tu kukabiliana na majanga yake, bali sasa inatoa mchango wake katika kujenga uwezo wa nchi nyingine za Afrika, na hivyo kuimarisha ushirikiano wa kikanda katika kukabiliana na changamoto zinazofanana.