Rais wa Marekani, Donald Trump, amefichua kuwa amefanya mazungumzo na Rais wa China, Xi Jinping, pamoja na maafisa wengine waandamizi wa China. Hata hivyo, Trump hakutoa taarifa zaidi kuhusu tarehe au yaliyojiri katika mazungumzo hayo. Trump alitoa kauli hiyo katika mahojiano na kituo cha habari cha Fox News, akisisitiza uhusiano wake mzuri na Rais Xi.
Licha ya Trump kuthibitisha mazungumzo hayo, hakueleza ni lini yamefanyika wala masuala gani yaliyojadiliwa. Hapo awali, Trump alisema kuwa Marekani na China zitafanya mazungumzo bila haraka ili kupunguza mvutano wa kibiashara kati ya mataifa hayo mawili. Mazungumzo hayo yanatarajiwa kuwa na athari katika uamuzi wa kupunguza au kuahirisha ushuru wa bidhaa kati ya nchi hizo mbili. Hata hivyo, tarehe rasmi ya mazungumzo hayo haijathibitishwa.
Shirika la habari la Reuters liliripoti kuwa Ikulu ya Marekani (White House) na Wizara ya Mambo ya Nje ya China hazikujibu mara moja ombi la maoni kuhusu kauli za Trump.
Kabla ya hapo, mnamo Januari 17, Trump na Xi walifanya mazungumzo ya simu na kujadili masuala mbalimbali kama biashara, programu ya TikTok inayomilikiwa na kampuni ya ByteDance ya China, na hali ya kisiasa ya Taiwan. Hata hivyo, licha ya mazungumzo hayo, vita vya ushuru kati ya nchi hizo mbili viliendelea.
Mnamo Februari 4, Marekani ilianza kutekeleza ushuru wa asilimia 10 kwa bidhaa zinazoingizwa kutoka China. Siku sita baadaye, Februari 10, China ilijibu kwa kuchukua hatua za kulipiza kisasi kwa kutoza ushuru wa asilimia 10 hadi 15 kwa baadhi ya bidhaa zinazoingizwa kutoka Marekani.
Bidhaa zilizolengwa na ushuru wa China ni pamoja na mafuta ghafi, mashine za kilimo, magari makubwa, na malori ya mizigo, ambayo yote yatozwa ushuru wa asilimia 10. Makaa ya mawe na gesi asilia iliyosindikwa yatozwa ushuru wa asilimia 15. Aidha, China ilitangaza hatua za ziada kama vile kupunguza usafirishaji wa metali adimu tano, kuchunguza uwezekano wa kampuni ya Google kuwa na ukiritimba, na kuweka makampuni kama PVH Group na Illumina kwenye orodha ya mashirika yasiyoaminika.
Katika mahojiano hayo, Trump pia alizungumzia uhusiano wake na kiongozi wa Korea Kaskazini, Kim Jong-un. Alisema: "Ninamfahamu vizuri sana Kim Jong-un, labda kuliko mtu yeyote duniani," akionyesha tena ukaribu wake na kiongozi huyo.