Katika hatua ya kihistoria, Nepal imempata waziri mkuu wake wa kwanza mwanamke, Sushila Karki, ambaye amechukua madaraka ya kuongoza serikali ya mpito kufuatia machafuko ya kisiasa yaliyoitikisa nchi na kuing'oa serikali iliyopita. Akiwa na umri wa miaka 73, Karki, ambaye ni Jaji Mkuu Mstaafu wa Mahakama ya Juu, anatazamwa kama ishara ya matumaini mapya kwa taifa hilo la Asia ya Kusini.
Mara tu baada ya kuapishwa, Waziri Mkuu Karki alitangaza hatua zake za awali kwa kuwateua mawaziri watatu muhimu watakaoingia katika baraza lake la mpito. Aliwataja Kalman Gurung kuwa Waziri wa Nishati, Rameshor Kanal kama Waziri wa Fedha, na Om Prakash Ayal akishikilia wadhifa nyeti wa Waziri wa Mambo ya Ndani. Aidha, alitoa ahadi thabiti kwa taifa, akisema kuwa serikali yake itahakikisha uchaguzi mkuu unafanyika ifikapo mwezi Machi mwaka ujao, ndani ya kipindi cha miezi sita alichopewa.
Karki si mgeni katika medani ya umma nchini Nepal. Alijipatia umaarufu mkubwa alipokuwa akihudumu kama Jaji Mkuu kati ya mwaka 2016 na 2017, ambapo aliongoza vita isiyo na simile dhidi ya rushwa iliyokuwa imekita mizizi ndani ya serikali. Sifa yake ya uadilifu na kutoyumbishwa ndiyo iliyomfanya aungwe mkono na umma, hasa baada ya maandamano makubwa yaliyopewa jina la "Maandamano ya Kizazi Z" (Z Generation's protest) kusababisha vifo vya watu wasiopungua 72 na mamia ya majeruhi.
Maandamano hayo yalisababisha jeshi kuingilia kati na kuweka amri ya kutotoka nje, na hatimaye, viongozi walikubaliana kumchagua Karki kuongoza nchi katika kipindi hiki kigumu. Akizungumza na wananchi, alisema, "Uteuzi wangu umetokana na shinikizo na madai ya wananchi mitaani waliohitaji nipewe jukumu hili. Nitahakikisha natimiza wajibu wangu na kukabidhi madaraka kwa serikali ijayo baada ya uchaguzi huru na wa haki."
Hata hivyo, safari yake imejaa changamoto. Analazimika kusawazisha matarajio makubwa ya vijana walioandamana dhidi ya wanasiasa wakongwe, huku akiwa na jukumu zito la kujenga upya miundombinu ya serikali iliyoharibiwa na ghasia. "Tunachohitaji sasa ni kutokomeza rushwa, kujenga utawala bora, na kuleta usawa wa kiuchumi kwa wote," alisisitiza Karki, akionyesha dira ya uongozi wake.