Taifa la Nepal limeingia katika ukurasa mpya wa kisiasa baada ya Rais Ram Chandra Poudel kulivunja bunge na kuitisha uchaguzi mkuu wa mapema mwezi Machi mwakani. Hatua hii imekuja kufuatia ghasia na maandamano makubwa ya kupinga serikali yaliyosababisha vifo vya watu wasiopungua 72, huku aliyekuwa Jaji Mkuu mwanamke, Sushila Karki (73), akiteuliwa kuongoza serikali ya mpito na hivyo kuweka historia ya kuwa mwanamke wa kwanza kushika wadhifa wa Waziri Mkuu nchini humo.
Maandamano hayo yaliyoongozwa kwa kiasi kikubwa na vijana wa "Kizazi Z" (Gen Z), yalichochewa na hatua ya serikali kufungia mitandao ya kijamii, lakini chanzo hasa kinatajwa kuwa ni hasira ya muda mrefu kutokana na ugumu wa maisha na ufisadi uliokithiri miongoni mwa viongozi wakuu. Uteuzi wa Karki, ambaye ni mwanaharakati maarufu anayepinga rushwa, ulikuwa ni hitaji kuu la viongozi wa waandamanaji katika meza ya mazungumzo na Rais. Ataliongoza taifa kwa kipindi cha miezi sita hadi uchaguzi utakapofanyika.
Katika kikao chake cha kwanza na serikali, Waziri Mkuu Karki alitoa wito wa amani na umoja ili kujenga upya taifa, huku akiahidi kutoa fidia ya rupia milioni moja za Nepal (takriban Shilingi za Kitanzania milioni 17.5) kwa kila familia ya muathirika aliyepoteza maisha kwenye ghasia.
Licha ya hali kutulia mitaani, athari za machafuko hayo ni kubwa. Ripoti zinaonyesha kuwa maelfu ya majengo, yakiwemo ya ofisi za umma, yalichomwa moto na kuporwa, na kusababisha hasara ya mabilioni ya dola katika mji mkuu Kathmandu pekee. Vitendo vya udhalilishaji dhidi ya viongozi navyo vimeripotiwa, huku video ikisambaa mtandaoni ikimuonyesha mtu anayesadikiwa kuwa Waziri wa Fedha, Vishnu Prasad Paudel, akivuliwa nguo na kubaki na nguo za ndani huku akiburuzwa na waandamanaji.
Wakati Waziri Mkuu Karki akijaribu kuleta maridhiano, mvutano mkubwa wa kisiasa bado upo. Vyama vikuu vya siasa nchini humo vimepinga vikali hatua ya kuvunjwa kwa bunge, vikidai kuwa ni kinyume na katiba. Vimetishia kupeleka suala hilo katika Mahakama ya Juu na kusisitiza kuwa serikali ya mpito inapaswa kubatilisha uamuzi huo mara moja. Hali hii inaacha sintofahamu kuhusu mustakabali wa kisiasa wa Nepal kuelekea uchaguzi mkuu ujao.