Seneta wa Marekani kutoka chama cha Democratic, Mark Kelly wa Arizona, ametangaza kuwa ataachana na gari lake la Tesla, akimshutumu Mkurugenzi Mtendaji wa kampuni hiyo, Elon Musk, kwa kuwa na ushawishi mbaya kwa taifa.
Kupitia chapisho kwenye mtandao wa X (zamani Twitter) tarehe 14 Machi, Kelly aliandika: "Niliamua kununua Tesla kwa sababu ya mwendo wake wa kasi kama roketi, lakini sasa kila ninapoendesha gari hili, nahisi kama natangaza mtu anayoyumbisha serikali yetu na kuleta madhara kwa watu." Kisha akamalizia kwa maneno makali: "Kwa hiyo, Tesla—umeachishwa kazi!"
Katika video aliyoambatanisha na chapisho hilo, Kelly alisema, "Hii ni mara yangu ya mwisho kuendesha Tesla njiani kuelekea kazini Washington," akiongeza kuwa kila safari yake ndani ya gari hilo kwa siku 60 zilizopita ilimfanya kufikiria madhara anayoyaleta Musk kwa taifa la Marekani.
Seneta huyo alimshutumu Musk kwa kupunguza wafanyakazi kwa makusudi ili matajiri wa Marekani wapate punguzo kubwa la kodi. "Sasa ni wakati wa kuachana na gari hili," alisisitiza.
Mvutano kati ya wawili hao ulianza baada ya Musk kumuita Kelly "msaliti" kupitia X, akimtuhumu kwa kwenda Ukraine mara tu baada ya utawala wa Trump kusitisha msaada wa kijeshi kwa taifa hilo ili kushinikiza mazungumzo ya amani.
Kelly alimjibu Musk kwa kumtaka "aachane na siasa na arudi kuendesha SpaceX."
Kelly, ambaye aliwahi kuwa rubani wa jeshi la wanamaji na kushiriki katika Operesheni Desert Storm wakati wa Vita vya Ghuba, pia ni mwanasayansi wa anga aliyefanya safari nne za anga kupitia NASA.
Hapo awali, alisifu magari ya Tesla na alikuwa na uhusiano mzuri na Musk, lakini hali ilianza kubadilika baada ya Musk kuonyesha waziwazi uungaji wake mkono kwa Trump. Vyombo vya habari vya Marekani vimebaini kuwa Kelly, ambaye wakati fulani alizingatiwa kama mgombea mwenza wa Kamala Harris katika uchaguzi wa urais uliopita, sasa anazidi kumshambulia Musk, hasa kutokana na hatua za utawala wa Trump za kupunguza wafanyakazi wa serikali na kupunguza matumizi ya umma.