Katika kipindi cha miezi miwili tu tangu kuanza kwa muhula wa pili wa Rais Donald Trump, kumekuwa na ongezeko la mashambulizi ya kihalifu dhidi ya Tesla, kampuni inayoongozwa na Elon Musk, ambaye sasa ni miongoni mwa watu wenye ushawishi mkubwa katika serikali ya Trump.
Kwa mujibu wa ripoti ya The Washington Post ya Machi 8, tangu Trump aapishwe Januari 20, kumekuwa na angalau matukio 12 ya mashambulizi dhidi ya vituo vya Tesla, yakiwemo uharibifu wa magari ya umeme, maduka ya kampuni hiyo, na vituo vya kuchaji magari.
Katika tukio moja lililotokea Colorado, mwanamke aitwaye Lucy Grace Nelson aliharibu kwa makusudi mali katika duka la Tesla kwa siku 13 mfululizo. Alirusha chupa nne za mafuta yanayowaka (molotov cocktails) kwenye magari yaliyokuwa yameegeshwa karibu na duka hilo na kushuhudia moto ukiteketeza baadhi ya magari. Aidha, alipaka maandishi ya chuki kwenye lango la duka, akitumia rangi ya spray kuandika maneno "Nazi" na "F* Musk".
Mnamo Februari, mwanaume aitwaye Adam Matthew Lansky alifyatua risasi kwenye duka la Tesla lililopo Salem, Oregon, kwa kutumia bunduki ya mashambulizi ya nusu otomatiki. Wiki chache kabla ya tukio hilo, mtu huyo alikuwa tayari amerusha molotov cocktail kwenye duka hilo.
Katika matukio mengine ya hivi karibuni, vituo saba vya kuchaji magari vya Tesla vilivyopo kwenye kituo cha ununuzi cha Littleton, Massachusetts, viliteketezwa kwa moto unaoshukiwa kuwa wa hujuma. Pia, katika jimbo la Maryland, ukuta wa jengo la Tesla ulikutwa na maandishi ya rangi yaliyoandikwa "Mpinga Musk".
Chuki Dhidi ya Musk na Ushirikiano Wake na Trump
Matukio haya yamejitokeza katika kipindi ambacho Musk ameingia rasmi kwenye utawala wa Trump kama mkuu wa idara mpya ya Serikali ya Ufanisi (DOGE), inayosimamia kupunguza matumizi ya serikali. Musk, ambaye alichangia angalau dola milioni 288 (takriban shilingi trilioni 4.2) kusaidia kampeni ya Trump, ameongoza juhudi za kufuta ajira za maelfu ya watumishi wa umma, hatua ambayo imeibua upinzani mkubwa.
Mbali na hatua zake za kisera, Musk pia amekuwa akihusishwa na vitendo vinavyokanganya kisiasa, kama kufanya ishara inayofanana na saluti ya Nazi na kuonyesha uungaji mkono kwa vyama vya mrengo mkali wa kulia barani Ulaya. Hatua hizi zimemfanya kupoteza sehemu ya hadhi yake kama mjasiriamali wa teknolojia na badala yake kuonekana kama mshirika wa siasa kali.
Tofauti na awali, ambapo Musk alikuwa akijikita katika maendeleo ya teknolojia kupitia Tesla na SpaceX, sasa amejikita zaidi katika siasa, hali inayowafanya wengi kutafsiri Tesla kama ishara ya siasa za mrengo wa kulia badala ya teknolojia ya kijani na nishati mbadala.
Kutokana na hali hiyo, kampeni kubwa ya kususia bidhaa za Tesla imeanza kusambaa mitandaoni kwa alama ya reli (#TeslaTakedown). Watu wengi sasa wanaiona Tesla siyo tena kama chapa ya mazingira rafiki, bali kama nembo ya siasa kali.
Hofu ya Mashambulizi Kuongezeka
Vyombo vya usalama vina wasiwasi kwamba mashambulizi haya yanaweza kuendelea na hata kusababisha madhara makubwa zaidi. Polisi wamesema kuwa endapo hali haitadhibitiwa, ni suala la muda tu kabla ya mtu kujeruhiwa vibaya au kuuawa katika mashambulizi dhidi ya mali za Tesla.
Hata hivyo, wachambuzi wa masuala ya siasa na uchumi wanadai kuwa, licha ya shinikizo linaloongezeka dhidi ya Musk, ushawishi wake ndani ya utawala wa Trump huenda ukazidi kuimarika.
Dan Ives, mchambuzi wa masuala ya teknolojia kutoka Wedbush Securities, anasema uhusiano wa karibu kati ya Musk na Trump unaweza kuwa na manufaa kwa Tesla, hasa ikiwa serikali itarahisisha kanuni za udhibiti wa magari yanayojiendesha yenyewe. Ikiwa Musk ataweza kushawishi serikali kulegeza masharti haya, basi Tesla itaweza kupata faida kubwa zaidi katika sekta hiyo.
Democrats Wamtumia Musk Kama Silaha ya Kisiasa
Wakati hali hii ikiendelea, chama cha Democratic kimeanza kumtumia Musk kama silaha ya kisiasa dhidi ya Republicans. Katika matangazo yao ya kampeni, Musk anaonyeshwa akitumia msumeno wa umeme kusherehekea kupunguza matumizi ya serikali, huku wanasiasa wa Republican wakionekana kuwa na wasiwasi kuhusu hatua zake.
Kituo cha CNN kimeeleza kuwa matumizi ya Musk katika kampeni hizi ni jaribio la Democrats kupima kama hatua zake ndani ya utawala wa Trump zitakuwa mzigo wa kisiasa kwa chama cha Republican.
Kwa sasa, bado haijulikani ikiwa msimamo wa Musk utaathiri vibaya Tesla kwa muda mrefu, au ikiwa kampuni hiyo itaweza kupata manufaa kutoka kwa uhusiano wake na serikali ya Trump. Lakini jambo moja liko wazi—mwelekeo wa Musk umebadilika kwa kiasi kikubwa, na hatua zake zinaendelea kuzua mijadala mikali nchini Marekani na duniani kote.