Serikali ya Rais Donald Trump imewasilisha kwa Hamas pendekezo la kusitisha mapigano kwa muda ili kuweka mazingira ya kufanikisha makubaliano ya kusitisha vita kabisa. Masharti ya pendekezo hilo yanajumuisha kuachiliwa kwa mateka wote waliobaki hai na kurefusha usitishaji mapigano hadi katikati ya Aprili.
Kwa mujibu wa Baraza la Usalama wa Taifa la Marekani (NSC), wajumbe wa Marekani, akiwemo mjumbe maalum wa Mashariki ya Kati, Steve Witkoff, na afisa mwandamizi wa NSC wa masuala ya Mashariki ya Kati na Afrika Kaskazini, Eric Trager, waliwasilisha mpango huo kwa Hamas mnamo Machi 12 jijini Doha, Qatar.
Pendekezo hilo linahusisha kurefusha usitishaji wa mapigano hadi baada ya mwezi mtukufu wa Ramadhani, ambao unamalizika Machi 29, na sikukuu ya Kiyahudi ya Pasaka (Yom Kippur), inayoadhimishwa hadi Aprili 19. Lengo kuu ni kupata muda zaidi wa kufanikisha mazungumzo ya kudumu ya kusitisha vita.
Kwa mujibu wa White House, Hamas inapaswa kuwaachilia mateka waliobaki hai na kukubali kurefusha hatua ya kwanza ya usitishaji mapigano, hatua ambayo itaruhusu kurejeshwa kwa misaada ya kibinadamu katika eneo hilo.
NSC ilisisitiza kuwa "Marekani itaendelea kufanya kazi kwa bidii kutafuta suluhisho endelevu kwa mgogoro huu mgumu" na kwamba Hamas imepokea ujumbe wa moja kwa moja kupitia Qatar na Misri kuwa pendekezo hilo linapaswa kuanza kutekelezwa mara moja. Pia, Marekani inataka Hamas kumuachilia mateka mwenye uraia pacha wa Marekani na Israel, Ethan Alexander, bila kuchelewa.
Hata hivyo, Hamas bado haijakubali rasmi pendekezo hilo.
NSC ilionya kuwa Hamas inacheza "mchezo hatari" kwa kuamini kuwa muda uko upande wao. "Hamas inaelewa fika tarehe ya mwisho ya pendekezo hili, na ikikosa kuitikia kwa wakati, italazimika kukabiliana na matokeo makubwa," iliongeza taarifa hiyo.
Zaidi ya hayo, NSC ilibainisha kuwa Rais Trump ameweka wazi kuwa Hamas italipa "gharama kubwa" endapo haitatekeleza masharti ya pendekezo hilo kwa wakati.
Kwa sasa, hatua ya kwanza ya makubaliano ya usitishaji mapigano kati ya Israel na Hamas ilimalizika Machi 1, na pande zote mbili bado hazijafikia muafaka wa kurefusha mkataba wa kusitisha mapigano.