Shirika la Umoja wa Mataifa la Kuhudumia Wakimbizi (UNHCR) limeripoti kuwa takriban watu 80,000 wameyakimbia makazi yao kutokana na mzozo unaoendelea Mashariki mwa Jamhuri ya Kidemokrasia ya Congo (DRC).
Kati ya wakimbizi hao, zaidi ya 61,000 wamevuka mpaka na kuingia Burundi wakisaka hifadhi. Burundi imekuwa moja ya nchi zinazopokea idadi kubwa ya wakimbizi kutokana na mapigano yanayoendelea kati ya vikosi vya serikali ya DRC na kundi la waasi la M23.
Mapigano hayo yamechochewa zaidi na uungwaji mkono wa Rwanda kwa waasi wa M23, hali iliyowasaidia kuchukua udhibiti wa maeneo kadhaa mashariki mwa DRC, ambayo ni maarufu kwa utajiri wake wa madini. Kutokana na hali hiyo, maelfu ya watu wameendelea kuyahama makazi yao, huku UNHCR ikitaja mgogoro huo kuwa moja ya majanga mabaya zaidi ya kibinadamu duniani.
Katika hatua nyingine, Ujerumani imetangaza kusitisha msaada wake mpya kwa Rwanda kutokana na mashambulizi yanayofanywa na waasi wa M23 mashariki mwa DRC. Ripoti za wataalamu wa Umoja wa Mataifa zinadai kuwa kundi hilo la waasi linapata msaada kutoka kwa jeshi la Rwanda, madai ambayo Kigali imekuwa ikikanusha mara kwa mara.
Mzozo huu umeendelea kuzua wasiwasi mkubwa wa kimataifa, huku juhudi za kidiplomasia zikihitajika ili kurejesha utulivu katika ukanda wa Maziwa Makuu.