Janga la joto kali linazidi kusababisha maafa kote ulimwenguni, na sasa limegharimu maisha ya kiongozi wa watalii nchini Italia. Giovanna Maria Zammarino, mwenye umri wa miaka 56, alianguka na kufariki ghafla wakati akiongoza watalii katika eneo maarufu la Colosseum, Roma, kutokana na joto jingi. Kifo chake kimesababisha mshtuko mkubwa na kupelekea vyama vya viongozi wa watalii kudai mabadiliko ya haraka ya saa za kazi ili kuepuka majanga mengine.
Kulingana na ripoti za vyombo vya habari vya kimataifa kama The Guardian ya Uingereza na Le Figaro ya Ufaransa, Zammarino alianguka mnamo Agosti 19, 2025, majira ya saa 6 jioni. Watalii na wahudumu wa dharura walijaribu kumpatia huduma ya kwanza, ikiwemo kumfanyia 'cardiopulmonary resuscitation (CPR)', lakini jitihada zao hazikufua dafu. Alikata roho papo hapo. Kufuatia kifo chake, Colosseum iliheshimu tukio hilo kwa kuzima taa zake saa tatu usiku, Agosti 20.
Tukio hili la kusikitisha limetokea wiki chache tu baada ya Chama cha Viongozi wa Watalii nchini Italia kutoa onyo kali kuhusu hatari za kufanya kazi katika hali ya joto kali. Chama hicho kilisema kwamba joto lisilokuwa la kawaida halipaswi kuonekana kama tukio la kawaida, bali ni hali mpya inayohitaji tahadhari, mabadiliko, na ushirikiano. Chama kilisema kifo cha Zammarino ni dhibitisho tosha la hatari inayowakabili viongozi wa watalii na wametoa wito kwa mamlaka kubadilisha saa za kazi katika eneo la Colosseum. Wanapendekeza ziara zifanyike mapema asubuhi au jioni wakati joto linakuwa la wastani.
Kwa sasa, Colosseum hufunguliwa kuanzia saa 2:30 asubuhi hadi saa 1:15 jioni, kuanzia mwishoni mwa Machi hadi mwishoni mwa Septemba. Chama cha Viongozi wa Watalii kimetoa wito wa kubadilisha saa hizi. Kinapendekeza eneo la Colosseum, Forum la Kirumi, na Palatine Hill lifunguliwe kuanzia saa 1:00 asubuhi na kufungwa saa 2:15 jioni, angalau kuanzia mwanzo wa Juni hadi mwishoni mwa Agosti. Chama kimekuwa kikitoa ombi hili kwa miaka mitatu sasa, kikiamini kuwa mabadiliko haya yatalinda afya ya umma, si kwa watalii tu, bali pia kwa viongozi wa watalii na wafanyakazi wengine. Hata hivyo, mamlaka za eneo hilo bado hazijatoa tamko lolote kuhusu ombi la chama hicho.