Hali ya hewa imetawaliwa na vilio, majonzi na simanzi nzito katika jiji la Hong Kong. Katika kile kinachoweza kutajwa kama moja ya majanga mabaya zaidi ya moto katika historia ya hivi karibuni ya jiji hilo, idadi ya watu waliopoteza maisha katika ajali ya kutisha ya kuungua kwa ghorofa za makazi imefikia watu 94 kufikia leo, siku ya tatu tangu tukio hilo litokee.
Kimbunga hicho cha moto kilitokea katika eneo la Tai Po, kaskazini mwa Hong Kong, kwenye majengo ya makazi yanayofahamika kama 'Wong Fuk Court'. Haya ni majengo marefu yenye ghorofa 32 (Lobi pamoja na ghorofa 31 za makazi) yaliyojengwa miaka ya 1980, ambayo kwa sasa yamegeuka kuwa tanuru la mauti kwa wakazi wake.
Kwa mujibu wa ripoti kutoka vyombo vya habari vya kimataifa ikiwemo Reuters, AP na *South China Morning Post (SCMP)*, juhudi za uokoaji bado zinaendelea huku matumaini ya kupata walio hai yakizidi kufifia. Kati ya miili 94 iliyopatikana, yumo askari mmoja wa Jeshi la Zimamoto aliyejitolea maisha yake akijaribu kuokoa wananchi, kitendo ambacho kimepongezwa kama cha kishujaa huku akililiwa na taifa hilo.
Chanzo cha Janga: Ukarabati Hugeuka Mauti
Wakati shughuli za kuzima moto zikiwa zimekamika kwa kiasi kikubwa, maswali magumu yameanza kuulizwa. Uchunguzi wa awali wa Jeshi la Polisi na mamlaka za Hong Kong umebainisha kuwa chanzo cha moto huo kusambaa kwa kasi ya ajabu ni ukarabati (renovation) uliokuwa ukiendelea katika majengo hayo kwa zaidi ya mwaka mmoja sasa.
Inaelezwa kuwa majengo hayo yalikuwa yamezungushiwa "viunzi vya mianzi" (bamboo scaffolding)—teknolojia ya asili inayotumika sana Hong Kong badala ya vyuma—pamoja na nyavu za usalama na fomu za ujenzi (styrofoam). Vitu hivi, ambavyo vina sifa ya kushika moto haraka, viligeuka kuwa kichocheo, likisambaza moto huo kutoka ghorofa moja hadi nyingine kwa kasi ya umeme, na kuwafungia wakazi ndani ya nyumba zao.
Mkono wa Sheria na Uzembe
Serikali ya Hong Kong haikutaka kulaza damu. Katika hatua za haraka za kuwajibishana, Jeshi la Polisi tayari limefanya msako mkali katika ofisi za kampuni inayohusika na ukarabati huo pamoja na kampuni ya usimamizi wa majengo hayo.
Mabosi watatu wa kampuni ya ukarabati wametiwa mbaroni kwa tuhuma nzito za kuua bila kukusudia (manslaughter). Hii ni baada ya kubainika kuwa kulikuwa na uzembe mkubwa katika matumizi ya vifaa vinavyoshika moto kiurahisi bila kuchukua tahadhari za kutosha, jambo lililosababisha maafa haya makubwa.
Hali ya Majeruhi na Muujiza wa Ghorofa ya 16
Katika taarifa ya kusikitisha, idadi ya majeruhi imefikia 76, wakiwemo askari wa zimamoto 11 waliojeruhiwa wakiwa kazini. Kati ya majeruhi hao, 12 wapo katika hali mbaya sana (mahututi) huku wengine 28 wakiwa na majeraha makubwa. Hata hivyo, wengine 22 wameruhusiwa kurejea nyumbani baada ya kupata matibabu.
Licha ya giza hilo nene, kulikuwa na mwanga wa matumaini pale waokoaji walipofanikiwa kumuokoa mtu mmoja akiwa hai katika ngazi za ghorofa ya 16, ikiwa ni zaidi ya saa 24 tangu moto huo uanze. Hata hivyo, simulizi za kuhuzunisha zimeendelea kutawala, huku waokoaji wakieleza kukuta miili ya watoto wadogo ikiwa imeteketea, jambo linaloumiza mioyo ya wengi.
Janga hili limeathiri vitalu saba kati ya nane vya 'Wong Fuk Court', ambapo jumla ya kaya 2,000 zinaishi. Hii inatajwa kuwa moja ya ajali mbaya zaidi za moto kuwahi kutokea katika majengo ya ghorofa, ikikumbusha umuhimu wa kuzingatia viwango vya usalama wakati wa ukarabati wa majengo yaliyokaliwa na watu.