Wachimbaji wadogo wa dhahabu katika mgodi wa Isanjabadugu, ulioko Nyakafulu, Mbogwe mkoani Geita, wamefanikiwa kulipa zaidi ya Shilingi bilioni 3.663 za mrahaba kwa serikali. Mafanikio haya yamekuja baada ya kupatiwa nishati ya umeme wa uhakika, jambo ambalo limepunguza kwa kiasi kikubwa gharama zao za uendeshaji tangu mwaka 2020.
Katibu wa mgodi huo, Bwana Patrick Basoga, aliyasema haya alipokuwa akizungumza na vyombo vya habari vilivyotembelea mgodini kujionea jinsi wachimbaji hao wanavyonufaika na uwepo wa umeme, ikiwa ni pamoja na uwezo wao wa kulipa mirahaba bila matatizo na mamlaka husika.
Alieleza kuwa, tangu walipoanza kutumia umeme mwaka 2020, mapato yao yameongezeka kwa kiasi kikubwa. Wamefanikiwa kukusanya jumla ya Shilingi bilioni 3.673 kwa ajili ya serikali. Kati ya kiasi hicho, Shilingi bilioni 1.925 zilikuwa mrahaba, Shilingi bilioni 1.59 zilikuwa ushuru kwa halmashauri, na Shilingi milioni 679 zilikuwa ushuru wa huduma.
Bwana Basoga alifafanua kuwa mafanikio haya yanatokana na kupunguziwa gharama za uendeshaji baada ya serikali kuwapatia umeme. Alikumbusha kuwa tangu mgodi ulipoanza uzalishaji mwaka 2017, walikuwa wakitumia majenereta kwa ajili ya shughuli zao za uchimbaji, na walitumia kati ya lita 500 hadi 1000 za mafuta kwa siku.
"Tunaishukuru sana serikali kwa kutusikiliza na kutatua changamoto yetu ya umeme kwenye migodi. Sasa tuna uwezo wa kulipa maduhuri ya serikali na sisi wenyewe tunanufaika na rasilimali hii," alisema Bwana Basoga. Aliongeza ombi lao kwa serikali kuhakikisha sehemu ya mapato yanayopatikana yanarudishwa kwao kwa ajili ya kuboresha miundombinu ya barabara ili kurahisisha usafirishaji wa madini hadi sokoni.
Naye Meneja wa Mgodi wa Mahina Gold Mine, Bwana Frank Joseph, alisema kuwa katika kipindi cha miaka minne ya uongozi wa Rais Dkt. Samia Suluhu Hassan, wamenufaika sana na uwepo wa rasilimali hiyo kwa kujiinua kiuchumi, kusogezewa masoko karibu, na pia kulipa mapato yao. Alisema kuwa hadi sasa wameshalipa zaidi ya Shilingi milioni 700.
Bwana Joseph alieleza kuwa gharama za uendeshaji wa shughuli za uchimbaji madini ni kubwa ikilinganishwa na kile wanachokipata. Aliongeza kuwa kama serikali kupitia Wizara ya Madini na Wizara ya Nishati wasingewapatia umeme, wengi wao wangefilisika na kufungwa na taasisi za kifedha kutokana na kushindwa kulipa mikopo waliyochukua kwa ajili ya kuendesha shughuli zao.
Aidha, Bwana Joseph aliiomba serikali kuboresha upatikanaji wa umeme mgodini kwa kuwa wanapokea umeme wa awamu moja (single phase) na hukatika mara kwa mara. Walionyesha hofu yao kuwa mashine zao zinaweza kuharibika na hivyo kushindwa kuendelea na uzalishaji, kulipa kodi, na kujipatia kipato kwa ajili ya familia zao.