Katika kile kinachoonekana kama mapinduzi ya kimya kimya katika sekta ya ufundi nchini, Chuo cha Ufundi Stadi (VETA) Mkoa wa Shinyanga, kimeendelea kujipambanua kama kitovu cha uzalishaji wa wataalamu wa mitambo mizito, huku sifa zake zikivuka mipaka na kuvutia wanafunzi kutoka nchi jirani za Jumuiya ya Afrika Mashariki (EAC).
Hayo yalibainishwa wazi wakati wa sherehe za mahafali ya 45 ya chuo hicho yaliyofanyika mwishoni mwa wiki katika manispaa ya Shinyanga. Katika hafla hiyo iliyopambwa na vifijo na nderemo, jumla ya wahitimu 152 wa Daraja la Pili walitunukiwa vyeti, huku ujumbe mzito ukielekezwa kwao: "Ujuzi ni Mali."
Mgeni rasmi katika shughuli hiyo alikuwa Mkurugenzi wa Kampuni maarufu ya Jambo na Mbunge wa Jimbo la Meatu, Mhe. Salum Khamis, ambaye aliwakilishwa na Ndugu Salehe Mohamed. Akizungumza kwa niaba ya Mbunge huyo, Salehe aliwasilisha ujumbe wenye mashiko kwa wahitimu, akiwataka kutobweteka na vyeti bali wavitumie kama silaha ya kupambana na umasikini.
"Ndugu wahitimu, soko la ajira la sasa halitaki mtu wa kusubiri kuajiriwa ofisini. Ujuzi mlioapata hapa VETA ndio mtaji wenu mkuu. Nendeni mkawe chachu ya mabadiliko mtaani kwa kujiajiri na hata kutoa ajira kwa vijana wengine," alisisitiza Salehe. Kauli hii inakuja wakati serikali ikihimiza vijana kuchangamkia fursa za uchumi wa viwanda na kilimo biashara.
Mkuu wa Chuo hicho, Ndugu Abraham Mbughuni, alitoa taarifa iliyowashangaza wengi, akieleza kuwa ubora wa mafunzo ya VETA Shinyanga, hasa katika kozi ya uendeshaji na ufundi wa mitambo mizito, umeifanya Tanzania kuwa kimbilio la wanafunzi kutoka Kenya, Uganda, Rwanda, na Burundi. Hii ni ishara kuwa Tanzania inazidi kuimarika kidiplomasia na kiuchumi kupitia elimu ya ufundi.
"Wahitimu wetu wamekuwa lulu katika migodi mikubwa ya dhahabu na almasi iliyopo Kanda ya Ziwa na maeneo mengine, sambamba na viwanda vinavyozidi kuongezeka. Hii inathibitisha kuwa tunazalisha kile ambacho soko linahitaji," alijinasibu Mbughuni.
Hata hivyo, licha ya mafanikio hayo makubwa, chuo hicho kinakabiliwa na changamoto ya usalama. Mkuu wa Chuo aliiomba Serikali na wadau wa maendeleo kusaidia ujenzi wa uzio (fence) kuzunguka eneo la chuo. Ombi hili linakuja kufuatia ujenzi wa Stendi Kuu mpya ya Mabasi ya Mkoa wa Shinyanga jirani na chuo hicho, hali inayozua hofu ya usalama wa mali za chuo na utulivu wa wanafunzi kimasomo kutokana na muingiliano wa abiria na biashara.
Katika hatua nyingine, uongozi wa chuo umemwaga sifa kemkem kwa Rais wa Awamu ya Sita, Dk. Samia Suluhu Hassan, kwa maono yake ya kuhakikisha kila wilaya inakuwa na chuo cha VETA, hatua inayotajwa kama mkombozi kwa vijana wa Kitanzania.
Takwimu zinaonyesha kuwa chuo hicho kwa sasa kina jumla ya wanafunzi 518 wanaochukua fani mbalimbali. Katika mahafali hayo, kati ya wahitimu 152, wavulana walikuwa 98 na wasichana 54, ikionyesha kuwa bado kuna kazi ya ziada inahitajika kuhamasisha mtoto wa kike kujiunga na fani za ufundi ambazo kwa muda mrefu zilionekana kama za kiume.
Mwakilishi wa Mgeni rasmi aliahidi kufikisha kilio cha uzio kwa Mhe. Mbunge ili kishughulikiwe haraka, huku jamii ya Shinyanga ikisisitiziwa kuendelea kukiamini chuo hicho kama tanuru la kuoka vijana shupavu kiuchumi.