Mamlaka ya Mapato Tanzania (TRA) visiwani Zanzibar imevunja rekodi na kuvuka malengo ya makusanyo kwa mwaka wa fedha 2024/2025, ikikusanya Shilingi bilioni 647 dhidi ya lengo la Shilingi bilioni 600, ikiwa ni ufanisi wa asilimia 108. Mafanikio haya yametajwa kuwa chachu kubwa inayowezesha Serikali ya Mapinduzi ya Zanzibar kutekeleza miradi mbalimbali ya maendeleo kwa kasi.
Akiipongeza mamlaka hiyo juzi, Waziri wa Fedha na Mipango wa Zanzibar, Dk. Saada Mkuya Salum, alisema utendaji bora wa TRA ndio unaowezesha miradi mingi ya miundombinu inayoonekana visiwani humo. Alisema anaunga mkono agizo la Waziri Mkuu, Kassim Majaliwa, la kutaka miradi yote inayojengwa kwa fedha za kodi iwekewe mabango ili wananchi waone matunda ya kodi zao na wahamasike kulipa kwa hiari.
"Mipango mingi ya serikali inaitegemea TRA. Makusanyo haya ndiyo chanzo chetu kikuu cha mapato ya ndani. Nawapongeza sana watumishi kwa kazi nzuri," alisema Dk. Mkuya.
Baada ya mafanikio hayo, serikali na TRA wamejipanga kwa ajili ya mwaka mpya wa fedha 2025/26, wakiwa na mkakati mpya na lengo kubwa zaidi. Kamishna Mkuu wa TRA, Yusuph Mwenda, alitangaza kuwa lengo jipya la makusanyo kwa Zanzibar ni Shilingi bilioni 825.77.
Alifafanua kuwa hawatafikia lengo hilo kwa kuongeza viwango vya kodi, bali kwa kuongeza wigo wa walipakodi. "Mkakati wetu ni kuongeza wigo, sio viwango. Tutawawezesha walipakodi wanaolipa vizuri waendelee kulipa, wanaoshindwa tutawasaidia, na wale wanaoikwepa kodi tutawafanya walipe kwa mujibu wa sheria," alisema Mwenda.
Akisisitiza hilo, Dk. Mkuya aliitaka TRA kuacha kufanya kazi kwa mazoea na kubuni vyanzo vipya vya mapato, akitaja mahsusi sekta ya biashara za mtandaoni kama eneo jipya la kukusanya kodi. "Kazi nyingi za kiuchumi sasa zinafanyika mtandaoni, ni lazima na sisi tuwafuateni huko ili kila mmoja achangie maendeleo ya nchi yetu," alisisitiza Dk. Mkuya.