Serikali ya Tanzania imepiga hatua kubwa katika kuboresha mfumo wa usafiri wa umma jijini Dar es Salaam kwa kutangaza kusaini mikataba na watoa huduma watatu kwa ajili ya kuendesha Awamu ya Pili ya mradi wa Mabasi Yaendayo Haraka (BRT). Mradi huu utatekelezwa kwa ushirikiano wa ubia kati ya serikali na sekta binafsi (PPP), ikiwa ni miongoni mwa jitihada za kuleta mageuzi katika sekta ya usafiri wa jiji.
Akizungumza bungeni mjini Dodoma wakati akiwasilisha hotuba ya Bajeti ya Ofisi ya Rais – TAMISEMI, Waziri wa Nchi katika ofisi hiyo, Mhe. Mohamed Mchengerwa, alieleza kuwa hatua hii inaashiria mwanzo mpya katika historia ya usafiri wa Dar es Salaam. “Kwa mara ya kwanza, tunawahakikishia wananchi kuwa subira yao haikuwa bure. Tumefanikiwa kufikia hatua hii muhimu sana,” alisema Mhe. Mchengerwa mbele ya wawakilishi wa wananchi.
Ingawa Mhe. Mchengerwa hakutoa taarifa za kina kuhusu kampuni zitakazoendesha mradi huo, gharama zake, au muda wa mikataba iliyosainiwa, tangazo hili linatoa matumaini mapya kwa wakazi wa jiji wanaosubiri kwa hamu kuboreshwa kwa huduma za usafiri.
Katika maelezo yake, Waziri Mchengerwa alifahamisha kuwa serikali imeanza kusambaza kadi janja 62,000 kati ya kadi 200,000 zinazotarajiwa kutolewa katika awamu ya kwanza ya mradi huu. Sambamba na hilo, mageti ya kisasa yanafungwa katika vituo vyote 27 vya BRT vilivyopo. Pia, mfumo wa kielektroniki wa ukusanyaji wa nauli (AFCS) umeanza kusimikwa na utaunganishwa na mfumo wa kuongozea magari (ITS), ambao mchakato wake wa manunuzi unaendelea.
“Hatutaki kurudia makosa yaliyopita, bali tunajenga mfumo imara ambao unazingatia ubora, ufanisi, na heshima kwa usalama na maisha ya abiria,” aliongeza Mhe. Mchengerwa. Alieleza kuwa usafiri wa mabasi haya hautakuwa tu suluhisho la tatizo la msongamano wa magari, bali pia utachochea ukuaji wa uchumi na kuboresha maisha ya wakazi wa Dar es Salaam kwa ujumla.
Waziri huyo alisisitiza kuwa huduma ya BRT ni jawabu kwa kilio cha muda mrefu cha wananchi kuhusu usafiri ambao haukuwa na uhakika na ufanisi. “Tunajenga mfumo wa usafiri ambao utakuwa na heshima, uwajibikaji, na utatoa thamani halisi kwa kila shilingi itakayowekezwa,” alisema.
Kwa mujibu wa taarifa kutoka TAMISEMI, mradi huu ni sehemu muhimu ya utekelezaji wa Ilani ya Uchaguzi ya Chama Tawala na ni sehemu ya dhamira ya Serikali ya Awamu ya Sita inayoongozwa na Rais Samia Suluhu Hassan katika kuboresha huduma za kijamii kwa kutumia ubunifu na ushirikiano na sekta binafsi. Hatua hii inatarajiwa kuleta mapinduzi makubwa katika sekta ya usafiri wa umma na kuwanufaisha wananchi wengi wa Dar es Salaam.