Baada ya kusubiriwa kwa takriban miongo mitatu, ndoto ya Tanzania kuwa taifa kubwa la uzalishaji chuma barani Afrika iko karibu kutimia. Serikali imetangaza kufikiwa kwa makubaliano ya mwisho na mwekezaji mpya kutoka China, hatua itakayofufua rasmi mradi wa kimkakati wa uchimbaji makaa ya mawe Mchuchuma na chuma cha Liganga, uliokuwa umekwama tangu mwaka 1996.
Akitangaza habari hiyo njema jijini Dar es Salaam jana, Waziri wa Nchi, Ofisi ya Rais – Mipango na Uwekezaji, Prof. Kitila Mkumbo, alieleza kuwa serikali imekamilisha mazungumzo na kampuni ya Shudao Investment Group (SDIG), inayomilikiwa na Serikali ya Jimbo la Sichuan, China. Makubaliano hayo yanahitimisha mkwamo wa miaka 29 na kufungua ukurasa mpya wa maendeleo ya viwanda nchini.
"Tangu Januari mwaka huu, tumekuwa kwenye majadiliano ya kina na SDIG. Sasa tumekubaliana mambo yote ya msingi, na vipengele vya mkataba wa awali ambavyo havikulinda maslahi ya taifa vimerekebishwa," alisema Prof. Mkumbo, akisisitiza kuwa serikali imeshalipa fidia kwa wananchi na eneo la mradi linamilikiwa na serikali.
Utekelezaji wa mradi huu utakuwa na manufaa pacha: chuma kitakachozalishwa Liganga kitatumika kwenye ujenzi na kuimarisha sekta ya viwanda, na kuifanya Tanzania kuwa nchi ya nne kwa uzalishaji wa chuma barani Afrika. Wakati huo huo, makaa ya mawe kutoka Mchuchuma yatatumika kuzalisha umeme utakaoendesha kiwanda cha Liganga na kuingizwa kwenye gridi ya taifa.
Historia ya mradi huu ilianza mwaka 1996, lakini ilikumbwa na changamoto nyingi. Baada ya mchakato mrefu, kampuni ya Sichuan Hongda Corporation (SHG) ilishinda zabuni na kuunda ubia na Shirika la Taifa la Maendeleo (NDC) mwaka 2011. Hata hivyo, utekelezaji ulisimama mwaka 2015. Mabadiliko yamekuja baada ya kampuni ya SDIG kuinunua SHG mwaka 2024 na kuanza mazungumzo mapya na serikali ya Tanzania.
Mradi wa Mchuchuma na Liganga ni miongoni mwa miradi 12 ya kipaumbele katika Mpango wa Nne wa Taifa wa Maendeleo wa Miaka Mitano (2026–2031). Miradi mingine mikubwa ni pamoja na ule wa Gesi Asilia (LNG) Lindi, Reli ya Kisasa (SGR), na Bomba la Mafuta Ghafi (EACOP). Prof. Mkumbo alitaja kukamilika kwa miradi mikubwa kama Bwawa la Umeme la Julius Nyerere kama ushahidi wa uwezo wa serikali kutekeleza mipango yake.