Mkuu wa Mkoa wa Manyara, Queen Sendiga, ametoa tahadhari kwa Wakala wa Barabara Tanzania (TANROADS) na Wakala wa Barabara za Mijini na Vijijini (TARURA) kuhakikisha wanakuwa na uhakika wa upatikanaji wa fedha kabla ya kuingia katika mikataba na wakandarasi kwa ajili ya ujenzi wa barabara.
Sendiga aliyasema hayo katika kikao cha Bodi ya Barabara cha mwaka wa fedha 2025/26, kilichofanyika Februari 17, 2025. Alisisitiza kuwa ni muhimu kwa serikali kuepuka kusaini mikataba ya ujenzi wa barabara ikiwa hazina uhakika wa fedha za kukamilisha miradi hiyo. Hatua hiyo itasaidia kuepusha malalamiko na lawama kutoka kwa wananchi ambao wanatarajia kuona miradi ikikamilika kwa wakati.
"Wananchi wa sasa wana uelewa mkubwa. Wanauliza maswali wanapoona kazi haisongi mbele, hasa pale mikataba ya ujenzi inapokuwa imeshasainiwa. Haiwezekani kuwaambia wananchi kuwa hakuna fedha baada ya makubaliano kusainiwa," alieleza Sendiga.
Mbunge wa Mbulu Vijijini, Flatei Masaay, alielezea changamoto zinazoikabili sekta ya barabara katika kikao hicho. Alisema kuwa ongezeko la miradi mikubwa ya maendeleo pamoja na mapato madogo yanayokusanywa na serikali vimekuwa vikisababisha hali kuwa ngumu. Aliongeza kuwa mzigo wa deni la taifa unaongeza ugumu katika upatikanaji wa fedha kwa ajili ya miradi ya barabara.
"Sasa naogopa hata kuzungumzia barabara, maana kila nikizungumza, Waziri wa Ujenzi anabadilishwa!" alitania Masaay, akionyesha ukubwa wa changamoto zinazokumba utekelezaji wa miradi hiyo.
Kwa upande wake, Meneja wa TANROADS Mkoa wa Manyara, Dutu Masele, alikiri kuwa moja ya changamoto kubwa ni upungufu wa bajeti na kucheleweshwa kwa malipo kwa wakandarasi. Alisema hali hiyo inasababisha kukwama kwa utekelezaji wa miradi ya barabara kwa wakati uliopangwa.
Katika hatua nyingine, Mkuu wa Mkoa, Queen Sendiga, ameunda kamati maalum kwa ajili ya kuandaa mpango wa barabara mbadala itakayotumika wakati wa ujenzi wa Daraja la Msasani. Daraja hilo lipo kwenye barabara kuu inayounganisha Babati na Arusha, hivyo ujenzi wake unatarajiwa kuleta usumbufu kwa watumiaji wa barabara hiyo.
Kamati hiyo inajumuisha Meneja wa TANROADS Mkoa wa Manyara, Meneja wa TARURA Wilaya ya Babati, Diwani wa Kata ya Maisaka, Katibu wa CHADEMA Mkoa wa Manyara (Anna Ulomi), Mfanyabiashara wa Babati, Mkuu wa Usalama wa Wilaya ya Babati, na Mkuu wa Usalama Barabarani (RTO) Mkoa wa Manyara. Sendiga alipendekeza kuwa Mbunge wa Babati Mjini, Pauline Gekul, pia anaweza kuongezwa kwenye kamati hiyo.
Kamati hiyo imepewa jukumu la kufanya kazi kwa haraka na kuwasilisha mapendekezo yao ifikapo Februari 19, 2025.
"Lengo ni kushirikisha viongozi na wananchi katika kuhakikisha miradi ya maendeleo inatekelezwa kwa ufanisi na kwa kuzingatia maslahi ya wananchi," alisisitiza Sendiga.