Mkoa wa Ruvuma unashuhudia mapinduzi makubwa ya miundombinu kufuatia Serikali Kuu kuongeza kwa kiasi kikubwa fedha za uwekezaji kupitia Wakala ya Barabara za Vijijini na Mijini (TARURA). Ongezeko hili la bajeti linalenga kufungua fursa za kiuchumi, kurahisisha shughuli za kilimo, na kuboresha maisha ya wananchi kwa ujumla.
Akifafanua kuhusu hatua hiyo kubwa, Meneja wa TARURA Mkoa wa Ruvuma, Mhandisi Silvester Chinengo, alithibitisha kuwa kwa mwaka huu wa fedha wa 2025/2026, mkoa wake unatekeleza miradi ya maendeleo kwa kutumia bajeti ya kuvunja rekodi ya Shilingi Bilioni 22. Kiasi hiki ni ongezeko la zaidi ya mara tatu ikilinganishwa na Shilingi Bilioni 7 zilizotumika katika bajeti ya awali.
Mhandisi Chinengo alieleza kuwa TARURA Ruvuma inasimamia mtandao mpana wa barabara wenye jumla ya kilomita 7,147. Alitoa mchanganuo kuwa, kati ya hizo, kilomita 133.69 ni zile zilizojengwa kwa kiwango cha lami, kilomita 1,651.8 ni za changarawe, huku kilomita 5,360.6 zikiwa bado ni barabara za udongo.
Aliongeza kuwa, kutokana na uwekezaji unaoendelea, takriban asilimia 70 ya mtandao huo sasa unapitika katika misimu yote, iwe ni kiangazi au masika. Hili limekuwa mkombozi mkubwa kwa wananchi, hasa wakulima na wafanyabiashara.
"Barabara hizi zimeleta mabadiliko chanya. Kwa mfano, wakulima wetu wa mazao muhimu kama mahindi na kahawa sasa wanaweza kusafirisha mazao yao kwa urahisi na kuyafikisha sokoni yakiwa bado na ubora," alisema Mhandisi Chinengo. Alisisitiza kuwa hali hii inaongeza moja kwa moja kipato cha mwananchi na kukuza uchumi wa mkoa.
Kuonyesha kuwa kazi inaanza mara moja, Meneja huyo alibainisha kuwa tayari wamekamilisha taratibu za manunuzi kwa mikataba 43 yenye thamani ya Shilingi Bilioni 12.1. Alisema wako katika hatua za mwisho za kusaini mikataba hiyo ili wakandarasi waweze kuanza kazi mara moja.
Mafanikio ya uwekezaji huu tayari yameanza kuonekana. Mhandisi Chinengo alitolea mfano wa mwaka uliopita pekee, ambapo zaidi ya kilomita tatu za barabara za kiwango cha lami zilijengwa, na muhimu zaidi, ujenzi huo uliambatana na ufungaji wa taa za kisasa za barabarani.
"Sasa hivi tumeweka utaratibu kwamba kila barabara ya lami inayojengwa inaambatana na uwekaji wa taa. Hii si tu imeongeza usalama kwa watembea kwa miguu na vyombo vya moto, lakini pia imechochea sana shughuli za kiuchumi, hasa biashara za nyakati za usiku," alifafanua.
Hata hivyo, Mhandisi Chinengo alitoa wito kwa wananchi kushiriki katika kulinda miundombinu hiyo. Aliwaomba kuepuka tabia ya kutupa taka ngumu kwenye mitaro ya maji, kwani kufanya hivyo kunasababisha vizibo na kuharibu barabara zinazojengwa kwa gharama kubwa. "Serikali imetumia fedha nyingi, ni jukumu letu sote kuhakikisha barabara hizi zinadumu," alisisitiza.
Kwa upande wao, wakazi wa Ruvuma wameipongeza Serikali kwa maboresho hayo. Bi. Eva Ndomba, mkazi wa eneo la Makambi, alisema zamani barabara zilikuwa na nyasi ndefu na vumbi jingi, na hata waendesha pikipiki walipata shida kupita. "Lakini sasa tunashukuru sana. Tuna lami na taa zimewekwa. Tunapita vizuri na biashara zetu tunaendelea nazo hata usiku bila hofu yoyote," alisema Bi. Ndomba.
Kauli hiyo iliungwa mkono na Bw. Ally Musa, mkazi mwingine wa Makambi, ambaye alikumbushia jinsi walivyolazimika kutumia 'vichochoro' wakati wa masika kutokana na barabara kuu kutopitika. "Sasa hivi tunatumia barabara kuu bila shida. Uwekaji wa hizi taa umetusaidia sana sisi vijana kufanya shughuli zetu za hapa na pale hata usiku bila wasiwasi wa usalama," alihitimisha.