Kampuni kubwa ya teknolojia duniani, Microsoft, imetangaza mpango wa kupunguza takriban wafanyakazi 6,000, sawa na asilimia 3 ya nguvu kazi yake yote duniani. Hatua hii, iliyoripotiwa na gazeti la Financial Times tarehe 13 Mei 2025, inaelezwa kuwa sehemu ya mkakati mpana wa kampuni hiyo kurahisisha utendaji kazi wake na kupunguza idadi ya mameneja wa ngazi ya kati. Mabadiliko haya yanajumuisha ofisi za kimataifa na kampuni tanzu zinazomilikiwa kikamilifu na Microsoft.
Hii si mara ya kwanza kwa Microsoft kupunguza wafanyakazi mwaka huu wa 2025; tayari kampuni hiyo ilishaachisha kazi takriban watu 2,000 mapema mwaka huu kwa misingi ya utendaji kazi. Katika taarifa yake rasmi, Microsoft ilisema, "Tunaendelea kufanya mabadiliko muhimu ya kimuundo ili kufanikiwa katika soko linalobadilika kwa kasi."
Hatua hii ya Microsoft inaakisi mwenendo unaoshuhudiwa katika makampuni mengine makubwa ya teknolojia, maarufu kama "Big Tech," kama vile Amazon na Meta (kampuni mama ya Facebook na Instagram). Makampuni haya yamekuwa yakifanya mabadiliko makubwa ya kimuundo, yakiwekeza mabilioni ya dola katika teknolojia ya Akili Mnemba (AI) na kujaribu kubaki washindani wakubwa dhidi ya kampuni chipukizi kama OpenAI. Lengo kuu ni kuongeza ufanisi na kuelekeza rasilimali zaidi kwenye maeneo yanayokua kwa kasi, hasa AI.
Kwa mfano, Meta imeripotiwa kuwaachisha kazi takriban asilimia 5 ya wafanyakazi wake walioonekana kuwa na utendaji wa chini mwaka huu, na katika miaka ya hivi karibuni imepunguza takriban robo ya wafanyakazi wake wote. Amazon nayo haiko nyuma; ilitangaza mipango ya kupunguza mameneja wa ngazi ya kati ili "kuondoa urasimu," na mwaka 2023 iliachisha kazi watu 27,000 katika awamu mbili kubwa za upunguzaji. Hata kitengo chake cha Amazon Web Services (AWS) kilipunguza mamia ya wafanyakazi mwaka huu.
Licha ya upunguzaji huu wa wafanyakazi, Microsoft iliripoti matokeo ya kifedha yaliyovuka matarajio ya soko kwa robo ya kwanza ya mwaka. Kampuni hiyo ilisisitiza ukuaji mkubwa katika sekta yake ya huduma za 'cloud' (mawingu). Thamani ya hisa za Microsoft imeongezeka kwa kiwango kikubwa mwaka huu ikilinganishwa na washindani wake, na hivi karibuni ilirejesha nafasi yake kama kampuni yenye thamani kubwa zaidi ya soko duniani.
Mwezi uliopita (Aprili 2025), Afisa Mkuu wa Fedha wa Microsoft, Amy Hood, aliwaambia wawekezaji kuwa kampuni "inaweka mkazo katika kujenga timu zinazozingatia utendaji na kuongeza wepesi kwa kupunguza ngazi za usimamizi."
Mchambuzi kutoka RBC, Rishi Jaluria, anatazama mabadiliko haya ya wafanyakazi kama njia ya kufidia gharama kubwa za uwekezaji katika miundombinu ya Akili Mnemba. Alisema, "Ingawa idadi ya wafanyakazi bado inatarajiwa kuongezeka mwaka huu, kasi ya ongezeko hilo itakuwa ndogo kutokana na kuimarika kwa ufanisi." Aliongeza kuwa, "Makampuni makubwa kama haya mara nyingi huwa na ngazi nyingi sana za usimamizi." Hatua hizi za Microsoft na wengine katika "Big Tech" zinaashiria mabadiliko makubwa katika soko la ajira la teknolojia duniani, ambapo ufanisi na utaalamu katika AI vinazidi kuwa vigezo muhimu.