Kampuni kubwa ya teknolojia ya Microsoft imetangaza mpango wake wa kupunguza wafanyakazi wapatao 9,000 duniani kote. Hii inawakilisha chini kidogo ya asilimia 4 ya wafanyakazi wake wote, na itawaathiri wafanyakazi kutoka timu na ngazi mbalimbali za uzoefu. Msemaji wa Microsoft alibainisha katika taarifa iliyotumwa kwa vyombo vya habari kwa njia ya barua pepe kuwa, "Tunaendelea kutekeleza mabadiliko ya shirika yanayohitajika ili kujiweka katika nafasi nzuri zaidi ya kufanikiwa katika soko linalobadilika."
Tangazo hili linakuja baada ya Microsoft kufanya upunguzaji mwingine mkubwa wa wafanyakazi mwezi Mei uliopita, ambapo takribani wafanyakazi 6,000 walipoteza ajira zao. Wakati huo, Microsoft ilisema lengo la kupunguza wafanyakazi lilikuwa "kupunguza tabaka zisizohitajika za usimamizi," ikimaanisha mpango wa kupunguza muundo wa usimamizi.
Maafisa wa Microsoft waliieleza CNBC kuwa upunguzaji huu wa sasa wa wafanyakazi pia unalenga kupunguza idadi ya tabaka za mameneja kati ya wafanyakazi wa kawaida na uongozi wa juu. Zaidi ya hayo, Shirika la Habari la Bloomberg limeripoti kuwa makampuni ya teknolojia yanafanya marekebisho ya wafanyakazi ili kupunguza gharama nyingine, huku yakitumia fedha nyingi katika kuendeleza Akili Bandia (AI), ikiwemo mafunzo ya mifumo mikubwa ya lugha na ujenzi wa vituo vya data. Microsoft, ambayo imetumia mabilioni ya Dola za Marekani (sawa na Trilioni nyingi za Shilingi za Tanzania) kwenye vituo vya data na uendelezaji wa programu, imewaahidi wawekezaji wake kuwa itasimamia gharama zake ipasavyo.
Anurag Rana, mchambuzi kutoka Bloomberg Intelligence, ameeleza kuwa kupunguzwa kwa wafanyakazi kunaweza kusaidia kufidia ongezeko la matumizi yanayohusiana na ujenzi wa miundombinu ya AI. Aliongeza kuwa hatua hii pia inaweza kuashiria kuimarishwa kwa sera ya kampuni ya kutumia zana za AI ndani ya shirika.
Kufikia mwishoni mwa Juni mwaka jana, Microsoft ilikuwa na jumla ya wafanyakazi 228,000, ambapo 45,000 walikuwa wakifanya kazi katika idara ya mauzo na masoko. Microsoft imekuwa ikitangaza marekebisho makubwa ya kimuundo na mabadiliko ya sera za ndani mwishoni mwa kila mwaka wake wa kifedha, unaoishia mwezi Juni.