Katika jitihada za serikali kuleta mapinduzi katika sekta ya kilimo na kumwondolea mkulima utegemezi wa mvua, uwekezaji mpya wa teknolojia ya kisasa ya umwagiliaji unatarajiwa kuingia nchini. Hii inafuatia mazungumzo muhimu yaliyofanyika jijini Stockholm, Sweden, kati ya Balozi wa Tanzania anayewakilisha nchi za Nordic, Baltic na Ukraine, Mheshimiwa Mobhare Matinyi, na viongozi wa kampuni ya teknolojia ya kilimo ya SPOWDI.
Kwenye kikao hicho kilichofanyika katika ofisi za ubalozi, watendaji wakuu wa SPOWDI, Henrik Johanson na Christopher Thunell, walieleza kuhusu teknolojia yao ya kipekee inayotumia mashine ndogo inayojiendesha kwa nishati ya jua. Mashine hiyo husukuma maji kutoka kwenye bwawa dogo kupitia mipira maalum ya unyunyiziaji iliyotandazwa shambani, ikitumia maji kidogo kwa ufanisi mkubwa.
Kwa mujibu wa Ofisa Mtendaji Mkuu, Bwana Johanson, mfumo huu una uwezo wa kumwagilia eneo la mita za mraba 500 (takriban robo eka) ndani ya dakika 15 tu. “Hii ina maana kuwa mkulima mwenye shamba la eka moja anaweza kukamilisha umwagiliaji kwa muda mfupi sana, akipunguza upotevu wa maji, kuokoa muda, na kuwezesha mimea kupata maji stahiki kwa ukuaji bora. Matokeo yake ni mavuno mengi zaidi na bora," alifafanua Johanson.
Teknolojia hii inalenga kumwezesha mkulima mdogo kuongeza kipato chake kwa kulima zaidi ya msimu mmoja kwa mwaka bila kutegemea mvua na kwa gharama nafuu. Kampuni ya SPOWDI imevutiwa na mazingira bora ya uwekezaji nchini Tanzania, ikitaja sifa kama uchapakazi wa wananchi na sera nzuri za serikali zinazounga mkono sekta ya kilimo, ikiwemo kurahisisha upatikanaji wa mikopo kwa wakulima.
Shirika hili tayari linafanya kazi katika nchi kadhaa duniani, na kwa Afrika, wameanza shughuli zao nchini Kenya, hivyo Tanzania inatarajiwa kuwa nchi ya pili barani kunufaika na teknolojia hii.
Balozi Matinyi aliikaribisha rasmi kampuni hiyo nchini mwezi Novemba 2025 kwa ajili ya utambulisho na kuanza majaribio ya awali. Alisema hatua hii inaendana moja kwa moja na azma ya serikali ya awamu ya sita ya kuongeza pato la taifa, kukuza ajira, na kuifanya Tanzania kuwa muuzaji mkuu wa chakula nje ya nchi, hasa ikizingatiwa kuwa tayari nchi imefikia kiwango cha usalama wa chakula cha asilimia 140.