Rais mstaafu wa Tanzania, Dk. Jakaya Kikwete, ametoa wito kwa nchi za Afrika kuwekeza kwa nguvu katika kilimo cha kisasa, ili kukabiliana na changamoto za uhaba wa chakula na mabadiliko ya tabianchi. Akizungumza kwenye kongamano la kimataifa lililofanyika Addis Ababa, Ethiopia, Kikwete alisisitiza umuhimu wa kuachana na kilimo cha mazoea na kuingia kwenye matumizi ya teknolojia za kisasa.
Dk. Kikwete alieleza kuwa, Afrika inahitaji mageuzi makubwa katika sekta ya kilimo, kwa kuwekeza katika kilimo cha umwagiliaji, matumizi ya mbegu bora zinazohimili ukame, na mbolea za kisasa. Aliongeza kuwa, kuongeza idadi ya mabwawa ya umwagiliaji mashambani ni muhimu ili wakulima wasitegemee mvua pekee.
Changamoto zinazoikabili sekta ya kilimo Afrika ni nyingi, ikiwa ni pamoja na ukosefu wa mikopo kwa wakulima, masoko ya uhakika kwa mazao, na kiwango kidogo cha usindikaji wa mazao. Kikwete alisisitiza kuwa serikali pekee haiwezi kutatua changamoto hizi, bali inahitaji ushirikiano na sekta binafsi. Alitoa mfano wa Tanzania, ambapo miradi kama Ushoroba wa Kukuza Kilimo Kusini mwa Tanzania (SAGCOT) na Jenga Kesho Iliyo Bora Kupitia Kilimo (BBT) imekuwa na mafanikio makubwa katika kuboresha sekta ya kilimo.
Mabadiliko ya tabianchi yamekuwa na athari kubwa kwa kilimo Afrika. Ukame mkali, mafuriko, na vimbunga vimeharibu mashamba na mazao, na kuhatarisha usalama wa chakula. Kikwete na viongozi wengine waliohudhuria kongamano hilo, walikubaliana kuwa kuwekeza katika teknolojia za umwagiliaji ni muhimu ili kupunguza utegemezi wa mvua.
Rais wa Ethiopia, Taye Atske Selassie, alieleza jinsi nchi yake ilivyojitegemea kwa asilimia 100 katika uzalishaji wa ngano kwa kutumia kilimo cha umwagiliaji. Alisisitiza umuhimu wa ushirikiano kati ya nchi za Afrika katika kubadilishana uzoefu wa kuboresha uzalishaji wa chakula.
Katika kipindi hiki ambapo misaada kutoka nchi zilizoendelea inapungua, viongozi wa Afrika wamekubaliana kuwa ni lazima kuwekeza katika teknolojia za kisasa za kilimo. Kongamano hilo limekubaliana kufanyika kila mwaka, ili kuimarisha mshikamano wa Afrika katika kupambana na changamoto za tabianchi na usalama wa chakula.
Viongozi wengine waliohudhuria kongamano hilo ni pamoja na Rais mstaafu wa Nigeria, Goodluck Jonathan, Waziri Mkuu mstaafu wa Niger, Ibrahim Mayaki, na Waziri Mkuu mstaafu wa Ethiopia, Hailemariam Desalegn. Wote walisisitiza umuhimu wa kuwekeza katika kilimo cha kisasa ili kuhakikisha uhakika wa chakula na maendeleo ya kiuchumi Afrika.