Shirika la Maendeleo la Umoja wa Mataifa (UNDP) limerudisha tabasamu kwa wanawake wa Kitanzania wenye ndoto za kufanya mapinduzi katika sekta ya nishati, baada ya kuzindua awamu ya tatu ya programu ya ufadhili wa masomo ya shahada ya uzamili katika uhandisi wa nishati. Awamu hii inalenga kuwanufaisha wanawake kumi (10) wa Kitanzania, ikiwa ni sehemu ya juhudi za kuongeza ushiriki wa wanawake katika sekta hii muhimu na yenye mchango mkubwa katika uchumi wa nchi.
Akizungumza Dar es Salaam, Bw. Abasi Kitogo, Mwakilishi wa UNDP nchini, alibainisha vigezo muhimu kwa waombaji. Amesema kuwa fursa hii inawafaa wanawake wenye umri wa chini ya miaka 35, na lazima wawe na uelewa wa kutosha kuhusu masuala ya nishati. Dirisha la maombi lilianza rasmi Julai 15 na litafungwa Septemba 15, mwaka huu. Bw. Kitogo ametoa wito kwa wanawake wenye ndoto ya kuwa wahandisi wa nishati kuchangamkia fursa hii adhimu, akisisitiza umuhimu wa programu hii katika kukabiliana na changamoto za mabadiliko ya tabianchi. "Kama shirika, tunaona hili kama jukumu muhimu, hasa katika kukabiliana na tatizo la mabadiliko ya tabianchi. Matumizi sahihi ya nishati husaidia sana kupunguza uzalishaji wa hewa chafu. Kama UNDP, tutaangalia namna ya kuongeza wigo zaidi wa mafunzo katika programu hii," alifafanua Bw. Kitogo.
Kutoka Wizara ya Nishati, Mkurugenzi Msaidizi wa Rasilimali Watu, Bw. Wilison Nyamanga, alieleza matumaini makubwa ya serikali kwa wahandisi wanawake watakaofaidika na programu hii. Alisema kuwa wahandisi hawa wanatarajiwa kuchangia kikamilifu katika matumizi bora ya umeme na kupunguza upotevu usio wa lazima. "Programu hii ni muhimu na inatusaidia kusukuma mbele ajenda ya matumizi bora ya nishati nchini," alisema Nyamanga. Alisisitiza kuwa kihistoria, taaluma ya uhandisi imekuwa ikitawaliwa na wanaume nchini Tanzania, lakini sasa programu kama hii inazalisha wahandisi wa kike ambao, kwa mtazamo wake, wana "uchungu" zaidi na masuala ya matumizi bora ya nishati kwa kuwa yanawagusa moja kwa moja. Aliongeza kuwa wanawake hao watasaidia jamii kuelewa jinsi ya kutumia umeme kwa ufanisi na hata kuelewa namna ya kudhibiti bili za umeme.
Nyamanga pia alikumbushia mkutano mkubwa wa hivi karibuni wa nishati uliofanyika Tanzania, uliowakutanisha takriban marais wote wa Afrika, jambo linaloashiria Tanzania imepiga hatua kubwa katika sekta ya nishati. "Programu hii inatujengea uwezo katika kusukuma ajenda ya nishati na kuhakikisha inatekelezwa vizuri," alisisitiza. Alitoa shukrani za dhati kwa UNDP, Umoja wa Ulaya (EU), na Ubalozi wa Ireland kwa msaada wao, akibainisha kuwa mabadiliko tayari yanaonekana, ikiwemo ongezeko la uwiano wa wahandisi wa kike na kiume katika ajira mpya serikalini. Alieleza pia kuwa wahitimu wa programu hii watakuwa wataalam wa uhakiki ubora na ufanisi wa matumizi ya umeme, jambo litakalosaidia pakubwa kupunguza matumizi yasiyo ya lazima.
Naibu Mkuu wa Ushirikiano kutoka Ubalozi wa Ireland, Bi. Jeris Muhiny, alieleza fahari ya nchi yake kushirikiana na Tanzania katika safari ya kuelekea ulimwengu mpya wa nishati. Alisema kuwa kupitia UNDP, wanasukumwa kufikiria kuendelea zaidi katika kufadhili mipango inayolenga matumizi sahihi ya nishati.
Miongoni mwa wanufaika wa programu hiyo katika awamu zilizopita, Bi. Sherida Magomele, alishiriki uzoefu wake. Alisema kuwa kabla ya kujiunga na mafunzo hayo, alikuwa na ndoto kubwa ya kuwa mhandisi bingwa katika masuala ya nishati, na sasa anafurahia kuona ndoto zake zimetimia. "Ufadhili huu umekuwa na umuhimu mkubwa kwangu kwa sababu umenifanikishia kutimiza ndoto na kuongeza vitu vingi ikiwemo ujuzi mkubwa ambao utatumika kuhamasisha matumizi sahihi ya nishati kwa ukubwa wake," alisema Bi. Magomele.