Mafanikio ya Tanzania katika soko jipya la kimataifa la biashara ya hewa ukaa, ambapo taifa limefanikiwa kuingiza zaidi ya Shilingi bilioni 40, yamevuta hisia za Jumuiya ya Ulaya (EU). Ujumbe wa mabalozi 12 wa jumuiya hiyo umeeleza kuridhishwa na jinsi nchi inavyotumia sekta ya misitu kukuza uchumi na kutoa ajira bila kuathiri mazingira.
Wakiongozwa na Balozi wa EU nchini, Christine Grau, ujumbe huo ulitembelea Chuo cha Viwanda vya Misitu Moshi (FITI) mkoani Kilimanjaro na kushuhudia jinsi msaada wa EU unavyosaidia kuongeza tija na teknolojia katika sekta hiyo. Balozi Grau alipongeza mkakati wa Tanzania wa kuhakikisha ukuaji wa uchumi unaenda sambamba na uhifadhi.
Hata hivyo, jambo lililowavutia zaidi mabalozi hao ni jinsi Chuo cha FITI kinavyowapa Watanzania ujuzi wa hali ya juu kuhusu fursa zilizopo kwenye biashara ya hewa ukaa. Mkuu wa chuo hicho, Dk. Zacharia Lupala, alisema mabalozi hao walifurahishwa kuona Watanzania wanavyoelewa na kuchangamkia fursa hiyo mpya, ambayo inatoa mapato makubwa kwa vijana na taifa kwa ujumla kupitia uhifadhi wa misitu.
"Hili ni eneo lenye fursa kubwa sana kiuchumi. Zaidi ya utalii wa kawaida, utalii wa kiikolojia ndani ya misitu na biashara ya hewa ukaa ni maeneo ambayo yatainua uchumi wetu kwa kasi," alieleza Dk. Lupala. Aliongeza kuwa biashara hii inahusisha kupata malipo kwa ajili ya kuhifadhi misitu ambayo inafyonza hewa chafu ya kaboni, na hivyo kuchangia katika vita dhidi ya mabadiliko ya tabianchi.
Kauli hiyo inaungwa mkono na takwimu za hivi karibuni kutoka Kituo cha Taifa cha Kuratibu Kaboni, ambacho kinathibitisha kuwa zaidi ya Shilingi bilioni 40 zimeingia nchini kupitia biashara hiyo, huku ikichangia matumizi ya nishati safi na utunzaji wa mazingira.