Mkurugenzi Mtendaji wa Benki ya Dunia Kanda ya Afrika, Dkt. Zarau Kibwe, ametoa pongezi zake za dhati kwa uongozi mahiri wa Rais Samia Suluhu Hassan kwa kusimamia sera bora za kiuchumi ambazo zimepelekea kuongezeka kwa hadhi ya Tanzania katika uhusiano wake na taasisi kubwa za kimataifa za fedha.
Dkt. Kibwe alifichua kuwa kabla ya Rais Samia kuingia madarakani, Tanzania ilikuwa imewekewa kikomo cha mkopo kutoka Benki ya Dunia, kikomo kilichofikia Dola bilioni tano za Marekani, sawa na zaidi ya Shilingi trilioni 10 za Kitanzania (TZS). Hata hivyo, ndani ya muda mfupi wa uongozi wake, kikomo hicho kimeongezeka kwa kasi hadi kufikia Dola bilioni 12 za Marekani, ambayo ni zaidi ya Shilingi trilioni 25 za Kitanzania (TZS).
"Sijui kama nyumbani mnaliona au kulizungumza hili. Katika muda mfupi wa uongozi wa Rais Samia, kikomo cha Tanzania katika uhusiano wake na Benki ya Dunia kimeongezeka maradufu. Hili si jambo la kawaida hata kidogo," alisisitiza Dkt. Kibwe wakati wa mkutano wake na Waziri wa Ujenzi, Mheshimiwa Abdallah Ulega, katika ofisi zake jijini Washington, Marekani.
Tanzania Yapata Hadhi Mpya Kimataifa
Dkt. Kibwe alifafanua zaidi kuwa kuongezeka kwa kikomo cha mkopo si tu suala la fedha, bali pia ni ishara ya kuimarika kwa taswira ya Tanzania katika jukwaa la kimataifa. Aliongeza kuwa, "Hivi sasa, Tanzania inatazamwa na kuheshimiwa kama moja ya mataifa yanayoendeshwa kwa ufanisi mkubwa barani Afrika, jambo ambalo linavutia wawekezaji na mashirika makubwa ya kimataifa kuja kuwekeza nchini."
Katika historia ya Tanzania, Dkt. Kibwe ni Mtanzania wa pili kushika wadhifa huu muhimu wa Mkurugenzi Mtendaji wa Benki ya Dunia Kanda ya Afrika. Anafuata nyayo za Bwana Christopher Kahangi, ambaye alishikilia nafasi hiyo kati ya mwaka 1968 na 1970.
Changamoto za Wakandarasi wa Kigeni
Waziri Ulega alitumia fursa hiyo kueleza maendeleo makubwa yanayofanyika katika miradi ya ujenzi wa barabara, mwendokasi, na madaraja ambayo yanafadhiliwa kwa sehemu kubwa na Benki ya Dunia. Hata hivyo, aligusia changamoto zinazojitokeza, hasa kwa wakandarasi wa kigeni ambao wanapata miradi nchini lakini wanakwamisha utekelezaji wake kutokana na mfumo wa malipo.
"Baadhi ya wakandarasi wa nje wanaopewa kazi Tanzania hukumbwa na ucheleweshaji wa malipo kwa sababu fedha zao hulipwa katika akaunti zao za nje. Tunadhani ni vyema kampuni hizi zifungue akaunti hapa nchini au walipwe haraka ili miradi isikwame," alishauri Waziri Ulega.
Katika majibu yake, Dkt. Kibwe alisema alishuhudia maendeleo makubwa katika miundombinu ya barabara za mijini wakati wa Mkutano wa Kimataifa wa Masuala ya Nishati uliofanyika jijini Dar es Salaam.
Pongezi hizi kutoka Benki ya Dunia kwa Tanzania zinaonyesha wazi kuimarika kwa usimamizi wa uchumi na miradi ya maendeleo nchini. Hali hii inaifanya Tanzania kuwa kivutio kikubwa kwa uwekezaji wa kimataifa na inaashiria mafanikio makubwa katika juhudi za serikali za kuboresha maisha ya Watanzania.