Mkurugenzi Mtendaji wa Benki ya Dunia (WB) kwa Kanda ya Afrika, Dkt. Zarau Kibwe, ameonesha kufurahishwa na jinsi Serikali ya Tanzania inavyosimamia miradi ya maendeleo, akisema kuwa sifa ya nchi kimataifa imeimarika kwa kiasi kikubwa. Dkt. Kibwe alieleza kuwa Tanzania sasa inatambulika kama moja ya nchi zinazoongoza kwa ufanisi katika bara la Afrika.
Alipokuwa akizungumza jijini Washington, nchini Marekani, baada ya kukutana na Waziri wa Ujenzi wa Tanzania, Mheshimiwa Abdallah Ulega, Dkt. Kibwe alisema kuwa uongozi thabiti wa Rais Samia Suluhu Hassan umewezesha ongezeko kubwa la kiwango cha mkopo ambacho Tanzania inaweza kukopa kutoka Benki ya Dunia. Kiwango hicho kimepanda kutoka Dola za Marekani bilioni 5 (ambazo ni zaidi ya shilingi trilioni 10 za Kitanzania) hadi kufikia Dola za Marekani bilioni 12 (zaidi ya shilingi trilioni 25 za Kitanzania).
"Sijui kama nyumbani mnafahamu hili. Katika kipindi kifupi cha uongozi wa Rais Samia, uwezo wa Tanzania kushirikiana na Benki ya Dunia umeongezeka kwa kiwango kikubwa sana. Hili si jambo la kawaida," alisisitiza Dkt. Kibwe.
Kwa upande wake, Waziri Ulega alimpongeza Dkt. Kibwe kwa mafanikio yake kama Mtanzania anayeshikilia nafasi ya juu katika Benki ya Dunia, akisema kuwa taifa linajivunia sana mchango wake. Alitumia nafasi hiyo kuelezea maendeleo ya miradi mbalimbali inayofadhiliwa na Benki ya Dunia nchini Tanzania, ikiwemo ujenzi wa barabara kuu, mradi wa mabasi yaendayo haraka (BRT), na ujenzi wa madaraja muhimu.
"Nimekuwa nikisikia sifa zako nyingi sana kabla sijakutana nawe. Waziri wa Fedha, Mheshimiwa Mwigulu Nchemba, alinieleza mengi mazuri kukuhusu, na hata nyumbani watu wanazungumzia mchango wako mkubwa. Hongera sana, na endelea na kazi nzuri," alisema Waziri Ulega kwa kumtia moyo Dkt. Kibwe.
Katika mazungumzo yao, Waziri Ulega aligusia pia changamoto inayojitokeza kwa baadhi ya wakandarasi kutoka nje ya nchi kuchelewesha miradi kwa sababu ya kutokuwa na akaunti za benki hapa Tanzania. Alipendekeza kuwa ni muhimu kwa makampuni hayo kufungua akaunti za benki ndani ya nchi ili kurahisisha mchakato wa malipo na kuepusha ucheleweshaji usio wa lazima wa miradi.
"Kuna tatizo la wakandarasi hawa kutokuwa na akaunti za benki hapa nchini. Sasa, ninyi ndio mnaowalipa. Tunaona ni vyema kampuni hizi ziwe na akaunti hapa Tanzania ili kuwezesha malipo kufanyika kwa haraka na miradi isikwame," alifafanua Waziri Ulega.
Dkt. Kibwe alimhakikishia Waziri Ulega kuwa Benki ya Dunia itaendelea kuwa mstari wa mbele kushirikiana na Tanzania katika juhudi zake za maendeleo, huku akimpongeza Waziri kwa kazi nzuri anayoifanya katika sekta ya ujenzi.
"Niliona mabadiliko makubwa jijini Dar es Salaam, na nikaambiwa ‘there is a new sheriff in town’ (kuna kiongozi mpya madhubuti). Hongera sana kwa kazi nzuri, juhudi zako zinaonekana," alisema Dkt. Kibwe, akimaanisha kuwa uongozi wake unaonekana kuleta mabadiliko chanya.
Benki ya Dunia pia imethibitisha kuendelea kuunga mkono miradi mikubwa ya miundombinu nchini Tanzania, ikiwemo ujenzi wa barabara muhimu zinazoelekea Kusini mwa nchi na mradi wa Daraja la Mzinga katika eneo la Kongowe, jijini Dar es Salaam. Miradi hii ni muhimu kwa uchumi na maunganisho ya kijamii nchini.
Dkt. Kibwe anakuwa Mtanzania wa pili kushika wadhifa huu wa juu wa Mkurugenzi Mtendaji wa Benki ya Dunia kwa Kanda ya Afrika, ambayo inasimamia nchi 23. Mtanzania wa kwanza kushika nafasi hiyo alikuwa Christopher Kahangi, ambaye alihudumu kati ya mwaka 1968 na 1970. Hii inaonesha kuwa Watanzania wanaendelea kuaminiwa katika nafasi za uongozi za kimataifa.