Wizara ya Afya imetoa ufafanuzi kuhusu taarifa zinazosambaa kwenye mitandao ya kijamii, zikidai kuwa Bi. Neema Kilugala, mkazi wa Daraja Mbili, mkoani Arusha, alibadilishiwa mtoto wake baada ya kujifungua kwa njia ya upasuaji katika Hospitali ya Rufaa ya Mkoa wa Arusha, Mount Meru, tarehe 24 Machi, 2025.
Kulingana na maelezo ya Bi. Neema, baada ya kujifungua, alionyeshwa mtoto wake akiwa katika hali nzuri na muuguzi aliyekuwa akimhudumia. Hata hivyo, alipomletewa mtoto wake baadaye, aligundua kuwa alikuwa amevishwa vitenge ambavyo si vyake, jambo lililomfanya kuwa na wasiwasi mkubwa.
Muuguzi aliyekuwa kazini hospitalini hapo alieleza kuwa kulikuwa na mkanganyiko wa vitenge, na alijaribu kurekebisha tatizo hilo mara alipogundua.
Wizara ya Afya, kwa kushirikiana na uongozi wa hospitali, Katibu Tawala wa Mkoa wa Arusha, na Jeshi la Polisi, imechukua hatua za haraka kuchunguza kwa kina madai haya. Hatua hizo ni pamoja na:
Kuchukua sampuli za vinasaba (DNA) kutoka kwa wazazi wote waliojifungua kipindi hicho pamoja na watoto wao. Sampuli hizi zitapelekwa kwa Mkemia Mkuu wa Serikali kwa uchunguzi ili kubaini ukweli wa madai hayo.
Kumsimamisha kazi muuguzi anayehusika ili kuruhusu uchunguzi kufanyika kwa uhuru na ufanisi.
Wizara ya Afya imesisitiza kuwa uchunguzi wa kina na wa haki utafanyika, na mara baada ya kukamilika, taarifa rasmi itatolewa kwa umma. Pia, hatua stahiki zitachukuliwa kulingana na matokeo ya uchunguzi huo.
Wizara inatoa wito kwa wananchi kuwa na subira wakati uchunguzi ukiendelea na kuepuka kueneza taarifa za uzushi ambazo zinaweza kuleta taharuki.