Wizara ya Afya nchini Tanzania imechukua hatua ya kumsimamisha kazi muuguzi mmoja katika Hospitali ya Rufaa ya Mount Meru, iliyopo mkoani Arusha. Hatua hii imekuja kufuatia madai ya mama mmoja, mkazi wa Daraja Mbili, kuwa mtoto wake alibadilishwa baada ya kujifungua kwa njia ya upasuaji katika hospitali hiyo.
Aidha, wizara hiyo imechukua sampuli za vinasaba (DNA) kutoka kwa wazazi waliojifungua katika kipindi hicho, pamoja na sampuli za watoto, kwa ajili ya uchunguzi wa kina. Uchunguzi huu unafanywa na Ofisi ya Mkemia Mkuu wa Serikali ili kubaini ukweli wa madai hayo.
Taarifa rasmi iliyotolewa na Mkuu wa Kitengo cha Mawasiliano Serikalini Wizara ya Afya, Roida Andusamile, ilieleza kuwa mama huyo, anayejulikana kwa jina la Neema Kilugala, alijifungua mtoto wake kwa njia ya upasuaji mnamo Machi 24, mwaka huu. Inadaiwa kuwa muuguzi alimwonesha mtoto wake mara baada ya kujifungua, na mtoto alionekana kuwa mzima. Hata hivyo, baadaye, Neema aligundua kuwa mtoto aliyemkabidhiwa alikuwa si wake.
Taarifa hiyo ilifafanua zaidi kuwa, kulingana na maelezo ya Neema, alipopewa mtoto, aligundua kuwa vitenge alivyokuwa amefungwa mtoto huyo si vyake.
"Muuguzi wa hospitali hiyo alidai kuwa alichanganya vitenge na vya mtoto mwingine, hivyo akaahidi kwenda kubadilisha. Pamoja na kuchukua hatua hiyo, bado kulikuwa na hali ya sintofahamu," ilieleza taarifa ya Andusamile.
Kutokana na hali hiyo ya wasiwasi, Wizara ya Afya, kwa kushirikiana na Ofisi ya Katibu Tawala wa Mkoa wa Arusha pamoja na Jeshi la Polisi, iliamua kuchukua hatua za haraka. Hatua hizo ni pamoja na kuchukua sampuli za vinasaba kutoka kwa wazazi na watoto kwa ajili ya uchunguzi wa kisayansi.
Pia, kama ilivyoelezwa awali, muuguzi aliyemhudumia Neema amesimamishwa kazi ili kuruhusu uchunguzi huru na wa kina kufanyika. Wizara imeahidi kutoa taarifa rasmi mara baada ya uchunguzi kukamilika, na kuchukua hatua stahiki kulingana na matokeo.
Akizungumza na mtandao wa Millard Ayo, Neema alieleza kwa kina mkasa uliomkuta. Alidai kuwa baada ya upasuaji, aliambiwa kuwa mtoto wake alikuwa mzima na alikuwa na uzito wa kilogramu 3.1. Pia, aliulizwa kama alikuwa na ndugu, na alijibu kuwa mama yake alikuwepo.
"Walinifuata na kunipeleka kwenye chumba cha kupumzika, na saa moja kasoro nililetewa mtoto ambaye alifungwa vitenge si vyangu. Nilimtaarifu mama yangu, naye akamuita nesi na kumwambia aturudishie mtoto. Alirudi bila mtoto na kuanza kunizungusha, huku wakiniambia mtoto yupo kwenye chumba cha joto," alidai Neema.
Neema alihoji sababu za mtoto wake kupelekwa kwenye chumba cha joto wakati hakuambiwa kuwa alikuwa na tatizo lolote la kiafya baada ya kujifungua.
"Waliniambia mtoto yupo vizuri, lakini amehifadhiwa katika chumba cha joto. Walinizungusha, nikasubiri hadi asubuhi nilipokwenda kumuona, yule si mtoto wangu. Sijui walimpeleka wapi mtoto wangu. Nisingefanyiwa upasuaji, asingepotea. Namtaka mtoto wangu, alikuwa mweupe," alisisitiza Neema kwa uchungu.