Wakati timu ya "Safari Champions" iliyosheheni vipaji kutoka mitaani ikitambulishwa rasmi, kambi ya mabingwa wa nchi, Yanga, imetuma salamu, ikisema kuwa timu yao ya vijana imejipanga kikamilifu kwa ajili ya pambano la fainali ya Kombe la Safari Lager litakalopigwa Julai 26, mwaka huu.
Akizungumza jana, Julai 12, 2025, katika hafla ya utambulisho wa kikosi cha Safari Champions, Kocha wa Makipa wa timu ya vijana ya Yanga, Masoud Slim, alisema wanauchukulia mchezo huo kwa uzito mkubwa na hawatadharau wapinzani wao.
"Kwa upande wetu tupo tayari na tumejipanga vizuri. Tunaipongeza kampuni ya Safari kwa kampeni hii nzuri ya kuinua vipaji, lakini uwanjani tutakuwa kazini. Kila mchezaji wetu ana morali ya juu na anasubiri mchezo huu kwa hamu," alisema Kocha Slim.
Aliongeza kuwa Yanga inaunga mkono kwa dhati jitihada za kuibua vipaji, akifichua kuwa kupitia kampeni kama hii ya mwaka jana, walifanikiwa kuwasaidia vijana wanne kupata fursa za kucheza soka nje ya Tanzania. Alitumia fursa hiyo kuwasihi vijana waliochaguliwa katika timu ya Safari Champions kutumia vizuri nafasi hiyo ya kipekee.
Kwa niaba ya wachezaji wa Yanga, Komein Abubakari, alisema wamejiandaa kuhakikisha wanapata matokeo mazuri. "Sisi kama wachezaji tupo tayari. Tutafuata maelekezo ya benchi la ufundi ili tupate ushindi katika mchezo huu ambao tunajua utakuwa na upinzani mkubwa," alisema Komein.
Meneja wa Maudhui wa Yanga, Abiudi "Priva" Shayo, alitoa wito kwa mashabiki wa soka nchini kujitokeza kwa wingi katika Uwanja wa KMC, Mwenge, kushuhudia pambano hilo, akisema itakuwa ni fursa ya kuona mustakabali wa soka la Tanzania.
Kikosi cha Safari Champions kinaundwa na wachezaji 22 waliochaguliwa kutoka mikoa ya Mwanza, Arusha, Mbeya na Dar es Salaam.