Mabingwa watetezi wa Ligi Kuu, Yanga SC, wametangaza kuwa wamebakiza nafasi ya mchezaji mmoja tu kukamilisha usajili wao kwa ajili ya msimu ujao, huku wakiweka wazi mpango wao kabambe wa kuipeleka timu kuweka kambi nje ya nchi kwa ajili ya maandalizi ya mashindano ya ndani na ya kimataifa.
Akizungumza na wanahabari jana jijini Dar es Salaam, Ofisa Habari wa Klabu hiyo, Ali Kamwe, alisema zoezi la usajili kwa upande wao limekamilika kwa asilimia kubwa na wanatarajia kufunga daftari hilo ndani ya wiki hii.
"Tunafunga kazi ya usajili wiki hii, tumebakiza mchezaji mmoja tu," alisema Kamwe. Aliongeza kuwa klabu imeandaa utaratibu maalum wa kuwatambulisha wachezaji, ambapo wataanza kwa kuwaaga wanaoondoka, kisha watawataja walioongezewa mikataba, na kumalizia na kuwatambulisha nyota wapya kuanzia Jumapili ijayo hadi Agosti 3.
Katika hatua nyingine, Kamwe alifichua kuwa maandalizi ya msimu mpya (pre-season) yatafanyika kwa awamu mbili za kipekee.
"Kambi yetu itakuwa na awamu mbili. Tutaanza na awamu ya ndani hapa nchini. Baada ya hapo, tutasafiri kwenda Rwanda kumaliza deni letu kwa ndugu zetu wa Rayon Sports kwa kushiriki katika tamasha lao la 'Rayon Sports Day'," alifafanua Kamwe.
Alisema baada ya mchezo huo wa kirafiki dhidi ya Rayon Sports utakaopigwa Uwanja wa Amahoro, Kigali, timu itaingia katika awamu ya pili na muhimu zaidi ya maandalizi, ambapo itaweka kambi maalum nje ya mipaka ya Tanzania. Hata hivyo, hakuiweka wazi nchi ambayo timu itaenda, na hivyo kuacha shauku kubwa kwa mashabiki.
Mpango huu unaonyesha dhamira kubwa ya Yanga ya kujiandaa kikamilifu sio tu kutetea mataji yake ya ndani, bali pia kufanya vizuri zaidi katika michuano ya Ligi ya Mabingwa Afrika.