Vurugu India: Ziara ya Messi Yageuka Shubiri, Mashabiki Wang'oa Viti na Kudai Pesa Zao

Ziara iliyosubiriwa kwa hamu ya nyota wa soka duniani, Lionel Messi, nchini India imegeuka kuwa uwanja wa vita na ghasia. Vyombo vya habari vya Argentina (Clarin, La Nacion, Infobae) vimeripoti kuwa tukio la kumkaribisha Messi mjini Kolkata, Jumapili (Desemba 13), lilimalizika kwa vurugu kubwa kutoka kwa mashabiki waliokuwa na hasira.

Tukio hili, ambalo ni sehemu ya ziara ya 'GOAT India Tour', liliingia doa baada ya Messi kuondoka uwanjani mapema kuliko ilivyotarajiwa, akiwaacha mashabiki wakiwa wamepigwa na butwaa na hisia za kutapeliwa.

Chanzo cha Vurugu: "Tumelipa Dola 100 Kuona Mgongo?"

Mamia ya mashabiki walifurika katika Uwanja wa Salt Lake wakitarajia kumuona Messi akicheza au akitumia muda mwingi uwanjani. Hata hivyo, mambo yalikuwa tofauti:

1. Muda Mfupi: Messi aliingia, akazunguka uwanja kuwapungia mkono mashabiki, na kuondoka haraka.
2. Bei Mbaya: Viingilio vilikuwa vya juu sana, vikifikia Dola 100 (Zaidi ya TZS 260,000), kiasi ambacho ni kikubwa sana kwa mwananchi wa kawaida.
3. Viongozi Kuziba Watu: Mashabiki walilalamika kuwa wanasiasa na maafisa wa serikali walimzunguka Messi kiasi kwamba watu waliolipa pesa hawakuweza kumuona vizuri wala kupiga picha, na hata "Big Screen" hazikuonyesha vizuri.

Uharibifu na Majibu ya Polisi

Baada ya kubaini kuwa Messi hatacheza na ameondoka, uwanja uligeuka kuwa machafuko:

1. Mashabiki walianza kung'oa viti na kuvitupa uwanjani.
2. Chupa za maji zilirushwa hovyo.
3. Baadhi ya watu walivamia uwanja (Pitch Invasion).

Polisi wa India wamechukua hatua kali kudhibiti hali hiyo:

1. Kukamatwa kwa Waandaaji: Mkuu wa Polisi wa West Bengal, Rajeev Kumar, ametangaza kumkamata mwandaaji mkuu wa tukio hilo.
2. Kudai Pesa Zirudishwe: Polisi wamewataka waandaaji kutoa ahadi ya maandishi ya kurudisha pesa zote (Full Refund) kwa mashabiki waliolipa.
3. Sababu ya Kisheria: Polisi wamesema waandaaji walitengeneza "matumaini hewa" kwamba Messi angecheza mechi, wakati mpango halisi ulikuwa ni salamu tu.

Siasa na Sanamu ya Fut 20

Tukio hili limechukua sura ya kisiasa pia:

1. Gavana Aomba Radhi: Gavana wa West Bengal, Mamata Banerjee, ameomba radhi kupitia mtandao wa X (zamani Twitter) na kuahidi uchunguzi wa kina.
2. Tuhuma za Ufisadi: Naibu Waziri wa Elimu, Sukanta Majumdar, amekosoa chama tawala cha eneo hilo kwa kutumia tukio hilo kisiasa na kuruhusu ufisadi kwenye uuzaji wa tiketi.

Licha ya vurugu hizo, kabla ya tukio hilo, sanamu kubwa ya Lionel Messi yenye urefu wa futi 20 (mita 20) ilizinduliwa mjini humo. Sanamu hiyo iliyojengwa kwa chuma na nyuzi maalum inamuonyesha Messi akiinua Kombe la Dunia na inasemekana inawaniwa kuingia kwenye Kitabu cha Rekodi za Guinness.

Kwa sasa, Messi akiwa na wenzake wa Inter Miami, Rodrigo De Paul na Luis Suarez, wameondoka Kolkata chini ya ulinzi mkali kuelekea Hyderabad kuendelea na ziara hiyo ambayo pia itafika Mumbai na New Delhi.