Kinyang'anyiro cha Umoja Cup Rorya 2025 kimeingia katika hatua ya mtoano ya timu 16-bora, huku timu za Kabwana FC na Rorya United zikiwa za kwanza kujihakikishia nafasi katika robo fainali baada ya kuibuka na ushindi katika michezo mikali iliyopigwa mwishoni mwa wiki kwenye Uwanja wa Maji Sota.
Msisimko ulianza Jumamosi ambapo Kabwana FC walifanikiwa kuwazima wapinzani wao Mafundi FC kwa kuwachapa mabao 2-1. Ushindi huo uliwapa tiketi ya moja kwa moja ya kuingia katika hatua inayofuata ya mashindano. Siku iliyofuata, ilikuwa zamu ya Rorya United ambao walilazimika kuchimbana na Kirengo FC kwa dakika 90 bila kutikisa nyavu. Mshindi alipatikana kupitia changamoto ya mikwaju ya penalti, ambapo bahati iliwaangukia Rorya United kwa kuibuka na ushindi wa penalti 8-7.
Michuano hii, iliyoanza rasmi Agosti 10 ikiwa na jumla ya timu 20, ina lengo la kujenga amani na mshikamano miongoni mwa jamii ya Rorya, pamoja na kuibua na kukuza vipaji vya soka. Chini ya udhamini mkuu wa Peter Owino, mwaka huu zawadi zimeboreshwa na kuongeza ushindani.
Pazia la 16-bora litaendelea kufunguliwa wiki hii kwa ratiba inayoahidi burudani ya hali ya juu. Leo, Samary FC watachuana na Shirati Mji, huku kesho KMT FC wakipimana ubavu na Young Boys. Alhamisi, Rifa FC watakuwa na kibarua kigumu mbele ya Bubombi FC. Mapambano yataendelea Jumamosi kwa mchezo kati ya Bukura FC na Bweru FC, na hatua hii itahitimishwa Jumapili kwa pambano kati ya Msonga FC na Wanamaji FC.
Timu zinapambana vikali sio tu kwa ajili ya heshima, bali pia kwa ajili ya zawadi nono zilizoandaliwa. Katibu wa mashindano, Telly James, ameweka wazi kuwa bingwa atajinyakulia kombe lenye thamani ya TZS 300,000, fedha taslimu TZS 600,000, seti ya jezi na mpira. Mshindi wa pili ataondoka na TZS 400,000 pamoja na vifaa, huku mshindi wa tatu akipata TZS 150,000 na vifaa. Hata mshindi wa nne hataondoka mikono mitupu, kwani atapata seti ya jezi na mpira.
"Zaidi ya zawadi za timu, kutakuwa na tuzo za mtu mmoja mmoja kama mchezaji bora wa mashindano, mfungaji bora, kipa bora, timu yenye nidhamu na mchezaji bora anayechipukia," alieleza James.