Serikali ya Tanzania imeweka mkakati kabambe wa kuhakikisha timu za taifa zinafanya vizuri na kutwaa medali nyingi kwenye Michezo ya Jumuiya ya Madola itakayofanyika kuanzia Julai 23 hadi Agosti 3, 2026, nchini Scotland. Makamu wa Rais wa Jamhuri ya Muungano wa Tanzania, Dkt. Philip Mpango, amesisitiza umuhimu wa ushirikiano kati ya Baraza la Michezo la Taifa (BMT) na sekta binafsi katika kuhakikisha maandalizi yanakamilika kwa wakati na kwa ufanisi.
Akizungumza Ikulu jijini Dar es Salaam wakati wa kupokea Kifimbo cha Mfalme wa Uingereza, ishara ya mwanzo wa maandalizi ya michezo hiyo, Dkt. Mpango alitoa wito wa dhati kwa wachezaji na viongozi. "Kifimbo hiki ni ishara ya wajibu mliokabidhiwa. Nendeni mkaiwakilishe nchi yetu kwa heshima kubwa na mrejee na medali nyingi za ushindi," alisema Makamu wa Rais, akimkabidhi kifimbo hicho kwa mmoja wa wachezaji. Alipongeza jitihada kubwa za Kamati ya Olimpiki Tanzania (TOC) kwa kufanikisha ujio wa kifimbo hicho nchini. Msafara wa kihistoria wa kifimbo hicho uliwaunganisha wananchi na wanamichezo, ukipita katika maeneo mbalimbali muhimu ya jijini Dar es Salaam.
Katibu Mkuu wa Wizara ya Utamaduni, Sanaa na Michezo, Gerson Msigwa, alitoa ahadi ya Serikali ya kuhakikisha maandalizi yanaanza mapema ili kuepuka changamoto za dakika za mwisho. "Safari hii hatutakubali kupata medali chache. Nchi yetu imejaa vijana wenye vipaji vya ajabu, na Serikali imewekeza fedha nyingi katika maendeleo ya michezo na miundombinu," alisema Msigwa. Alieleza kwamba serikali inaendelea na ujenzi wa Kituo cha Michezo cha Babati, mkoani Manyara, ambacho kitatumika kwa mazoezi ya wachezaji.
Uamuzi wa kujenga kituo hicho Babati umelenga kutoa faida kubwa kwa wachezaji, hasa kutokana na hali ya hewa ya eneo hilo. "Babati ina hali ya hewa ya baridi, inayofanana na maeneo mengi ya nchi zinazoshiriki mashindano ya kimataifa. Hii itawasaidia wachezaji wetu kuzoea mazingira mapema na kufanya vizuri watakapokuwa huko," alieleza Msigwa.
Makamu wa Rais wa TOC, Henry Tandau, alibainisha kuwa ujio wa kifimbo hicho nchini ni wa saba, lakini una umuhimu wa kipekee mwaka huu. "Kifimbo hiki kimekuja na taswira tofauti; mwaka huu kinamwakilisha Mfalme badala ya Malkia wa Uingereza, kama tulivyozoea. Michoro iliyo juu yake itaiwakilisha vyema nchi yetu na utamaduni wetu," alisema Tandau. Kifimbo hicho, kinachotembeza ujumbe wa amani na ushirikiano, ni ishara ya matumaini mapya kwa michezo ya Tanzania.