Klabu ya Simba imeweka historia mpya katika soka la Tanzania, ikivunja rekodi yake yenyewe kwa kusaini mkataba mnono zaidi wa udhamini tangu kuanzishwa kwa Ligi Kuu Bara. Wanampwani hao wametangaza rasmi ushirikiano na Kampuni ya Kubashiri Matokeo Michezoni ya Betway, mkataba wenye thamani ya Shilingi bilioni 20 za Kitanzania, utakaodumu kwa miaka mitatu ijayo.
Mkataba huu mpya unakuja baada ya Simba kuvunja ule wa awali na Kampuni ya M-Bet, ambao ulisainiwa Julai 14, 2022, kwa miaka mitano na thamani ya Shilingi bilioni 26.1 (sawa na Shilingi bilioni 5.22 kwa mwaka). Mkataba huo na M-Bet ulisitishwa mwishoni mwa msimu wa 2024/25, miaka mitatu tu baada ya kuanza kutumika, kutokana na makubaliano ya pande zote mbili. Kwa mkataba mpya na Betway, Simba itapokea zaidi ya Shilingi bilioni 6.66 kwa mwaka, ikiwa ni ongezeko la takriban Shilingi bilioni 1.44 kwa mwaka ikilinganishwa na udhamini uliopita. Ongezeko hili linaashiria ukuaji mkubwa wa thamani ya klabu na mvuto wake kibiashara.
Akizungumza wakati wa hafla ya uzinduzi wa udhamini huo jijini Dar es Salaam, Mkuu wa Udhamini kutoka Betway, Joson Shield, alieleza kuwa uamuzi wa kuidhamini Simba unatokana na ukubwa na ushawishi wa klabu hiyo barani Afrika. "Tumechagua Simba kwa sababu ni klabu kubwa na yenye mashabiki wengi, inayofahamika kote Afrika. Tunaamini ushirikiano huu utasaidia kufikia malengo yetu ya kibiashara na kukuza michezo," alisema Shield.
Kwa upande wa viongozi wa Simba, mjumbe wa Bodi ya Wakurugenzi, Salum Mhene 'Try Again', alisisitiza kuwa udhamini huu utawezesha klabu hiyo kuendelea kukua na kufanya vizuri zaidi, hasa katika usajili wa wachezaji wenye viwango vya kimataifa. "Udhamini huu utaiwezesha timu yetu kufanya maandalizi bora na kuongeza ushindani kimataifa. Dhamira yetu kama viongozi ni kuhakikisha Simba inazidi kuwa kubwa na yenye mafanikio," alifafanua Try Again.
Makamu wa Rais wa Shirikisho la Mpira wa Miguu Tanzania (TFF), Athumani Nyamlani, aliipongeza Simba kwa hatua hiyo kubwa na kuwataka viongozi wa klabu kuhakikisha fedha hizo zinatumika kwa malengo yaliyokusudiwa, ikiwemo kuimarisha kikosi na miundombinu. Kaimu Ofisa Mtendaji Mkuu wa Simba, Zubeda Sakuru, alieleza kuwa udhamini huo utaleta "mapinduzi makubwa" ndani ya klabu na kuwataka mashabiki kuendelea kutoa ushirikiano.
Katika hatua nyingine, Meneja Habari wa klabu hiyo, Ahmed Ally, alithibitisha kuwa kikosi cha Simba kitaelekea Isimailia, Misri, kwa kambi ya wiki mbili itakayojumuisha mechi za kirafiki, ikiwa ni sehemu ya maandalizi ya msimu mpya. Ally pia alifichua kuwa klabu hiyo ilipanga kuanza kutangaza majina ya wachezaji wapya waliosajiliwa kuanzia jana usiku, ikionesha nia yao ya kuimarisha kikosi kwa ajili ya mashindano yajayo, ikiwemo Ligi Kuu, Kombe la Shirikisho (FA Cup), na mashindano ya kimataifa. Udhamini huu wa Betway unatarajiwa kuipa Simba nguvu mpya ya kifedha na kuwezesha klabu kutimiza malengo yake ya kuwa klabu kubwa barani Afrika.