Kikosi cha wachezaji tisa wa mchezo unaokua kwa kasi wa ‘minifootball’ kinatarajiwa kuondoka nchini kesho kuelekea Libya, kikiwa kimebeba matumaini ya Watanzania katika kambi maalum ya mafunzo na majaribio ya kimataifa. Safari hii inatajwa kuwa fursa ya kipekee kwa vijana hao kuonyesha vipaji vyao na kuipeperusha bendera ya Tanzania.
Akizungumza na wanahabari leo, Julai 11, 2025, wakati wa hafla ya kukabidhi vifaa vya michezo na tiketi za ndege kwa timu hiyo, Rais wa Chama cha Minifootball Tanzania (TAMFA), Deosdedit Mushi, alisema kambi hiyo itakayofanyika kuanzia Julai 13 hadi 22, itawakutanisha wachezaji kutoka mataifa 16.
"Lengo letu ni kuwapa vijana hawa jukwaa la kuonekana kimataifa, kujifunza kutoka kwa wengine, na kujenga uhusiano. Ni njia bora ya kuwakuza na kuwapa mwelekeo kuliko kukaa mitaani," alisema Mushi. Aliongeza shukrani kwa Serikali kupitia Baraza la Michezo la Taifa (BMT) kwa ushirikiano wao unaowezesha safari hiyo.
Kwa upande wake, Balozi wa Chama hicho, Othman Adam, alisema timu haikwendi Libya kushiriki tu, bali kushindana. Alisisitiza kuwa wamefanya maandalizi ya kina kwa takriban mwezi mmoja ili kuhakikisha wanakwenda kuwakilisha taifa ipasavyo.
"Tunaenda kushindana, si kushiriki. Maandalizi yamekuwa mazuri na tunakwenda kuiwakilisha bendera yetu kwa heshima. Tunamshukuru Rais Samia kwa uwekezaji wake kwenye michezo ambao matunda yake ndiyo haya tunayaona," alisema Adam.
Akizungumza kwa niaba ya wachezaji wenzake, Alex Peter, aliahidi kuwa wamejipanga vizuri na wako tayari kufuata maelekezo ya kocha wao ili kupata mafanikio na kuiletea nchi sifa. Mchezo wa minifootball unachezwa na wachezaji sita kwa kila upande, lakini unatumia sheria nyingi zinazofanana na za mpira wa miguu wa kawaida.