Hatimaye kilio cha miaka 28 kimefika mwisho. Taifa la Norway limefuta rasmi mzimu uliokuwa ukiwatafuna kwa miongo kadhaa na kufanikiwa kutinga Fainali za Kombe la Dunia za FIFA za mwaka 2026 zitakazofanyika Amerika Kaskazini. Na walifanya hivyo kwa kishindo cha aina yake: kwa kumchapa mwenyeji wao, Italia, kwa mabao 4-1 katika uwanja wa kihistoria wa Giuseppe Meazza jijini Milan, katika mchezo wa mwisho wa Kundi I.
Hii ni mara ya kwanza kwa Norway kufuzu kwa michuano hiyo mikubwa zaidi duniani tangu walipofanya hivyo mwaka 1998 nchini Ufaransa, kipindi ambacho wengi wa wachezaji wa sasa walikuwa bado hawajazaliwa.
Kwa miaka mingi, Norway ilionekana kama timu ya 'kuzimua jasho' tu barani Ulaya. Lakini sasa, mambo yamebadilika. Wameibuka na 'kizazi cha dhahabu' (golden generation) kinachoongozwa na mastaa wanaotikisa ligi kubwa za Ulaya. Tunawazungumzia watu kama mnyama wa mabao Erling Haaland (Manchester City), kiungo fundi Martin Ødegaard (Arsenal), na mshambuliaji Jørgen Larsen (Celta Vigo). Pamoja na mfumo mpya wa Kombe la Dunia kuongeza idadi ya timu hadi 48 kurahisisha kidogo, bado walipaswa kuonyesha uwezo wao uwanjani.
Walipangwa Kundi I wakiwa na vigogo Italia, Israel, Estonia, na Moldova. Wengi walitarajia Italia (Azzurri) wangeshika usukani kirahisi, huku Norway wakipigania nafasi ya pili. Lakini 'kizazi cha dhahabu' kilikuwa na mipango mingine. Kuanzia mechi ya kwanza walipoichapa Moldova 5-0, walionyesha kuwa hawana mzaha, na wakaendeleza moto huo hadi mechi ya mwisho iliyoamua nani anafuzu moja kwa moja.
Katika mchezo huo wa jana huko Milan, mambo yalianza vibaya kwa Norway. Italia, waliohitaji ushindi ili kunyakua tiketi, walipata bao la mapema dakika ya 11 kupitia kwa Francesco Esposito, na kuwapa mashabiki wao matumaini madogo yaliyokuwa yamebakia. Norway walivumilia na kwenda mapumziko wakiwa nyuma kwa bao moja.
Lakini kipindi cha pili kilikuwa ni tamthilia ya Norway. Dakika ya 63, kinda Antonio Nusa aliachia mkwaju mkali wa mguu wa kushoto uliojaa wavuni na kurejesha matumaini.
Bao hilo la kusawazisha lilikuwa kama kumchokoza nyuki aliyelala. Lilimwamsha Erling Haaland. Dakika tano tu baadaye (dakika ya 68), alimalizia kwa 'volley' safi pasi ya Oscar Bobb. Kabla hata Waitaliano hawajajua la kufanya, dakika moja tu baadaye (dakika ya 69), Haaland alifunga tena! Safari hii alimchambua kipa kwa ufundi baada ya pasi ya Morten Thorsby. Bao la nne lilikuja dakika za nyongeza kupitia kwa Jørgen Larsen aliyetokea benchi, na kuhitimisha aibu ya Italia nyumbani kwao.
Mabao hayo mawili yalimfanya Haaland kufikisha mabao 16 katika mechi 8 za mchujo, akifikia rekodi ya Robert Lewandowski (aliyoiweka na Poland kwenye mchujo wa Kombe la Dunia 2018) ya mabao mengi zaidi kwenye mchujo wa Ulaya. Pia, sasa ana mabao 55 katika mechi 48 tu alizoichezea timu yake ya taifa.
Wakati Norway wakishangilia kurejea jukwaa la dunia, Italia sasa wanakabiliwa na jinamizi la 'mtoano' (playoffs) tena. Baada ya kukosa Kombe la Dunia mbili zilizopita (2018 na 2022), sasa watalazimika kupigana na timu nyingine 15 (zilizoshika nafasi ya pili na zile za Nations League) ili kuepuka fedheha ya tatu mfululizo.