Wachezaji wapya wa kimataifa wa Azam FC wametuma salamu kwa wapinzani wao na mashabiki wa klabu hiyo, wakitangaza kwa sauti moja kuwa kipindi cha ukame wa mataji katika viunga vya Azam Complex kimefikia mwisho. Nyota hao watatu, golikipa Issa Fofana, winga Baraket Hmidi, na beki Ben Zitoune Tayeb, wameahidi kupambana kufa na kupona ili kuhakikisha klabu hiyo inatwaa mataji katika msimu ujao wa mashindano.
Ahadi hizo nzito zimetolewa na wachezaji hao wakiwa kambini, wakijiandaa na msimu mpya. Baraket Hmidi, raia wa Tunisia aliyesajiliwa kutoka CS Sfaxien, alisema amekuja Tanzania kuleta furaha kwa mashabiki. "Nina furaha sana kujiunga na Azam. Nitafanya kila kitu kuhakikisha timu inashinda michezo na mataji. Nadhani mashabiki wa timu hii watakuwa na msimu mzuri sana," alisema winga huyo.
Kauli yake iliungwa mkono na M-Tunisia mwenzake, beki Ben Zitoune, aliyesajiliwa kutoka Al Hilal ya Sudan. "Nimekubali kujiunga na Azam kwa sababu ni moja ya timu kubwa Afrika kwa sasa. Nawaahidi mashabiki kuwa nitaitumikia kwa nguvu na ujuzi wangu wote ili tupate mataji," alisema Zitoune.
Kwenye lango, mlinda mlango raia wa Ivory Coast, Issa Fofana, naye alitamba, akiahidi kulifanya lango la Azam kuwa salama muda wote. "Napenda kumshukuru kila mmoja aliyefanikisha ujio wangu. Naahidi nitalilinda lango la Azam, lengo ni kuipa timu ushindi na mataji," alisema Fofana, ambaye pia ametokea Al Hilal.
Usajili huu mkubwa unaonekana kuwa sehemu ya mkakati wa Azam FC kujiimarisha sio tu kwa ajili ya Ligi Kuu, bali hasa kwa ajili ya michuano ya kimataifa. Klabu hiyo inajiandaa na mchezo wa Kombe la Shirikisho Afrika dhidi ya El Merriekh FC Bentiu ya Sudan Kusini, utakaopigwa mwezi ujao. Maneno haya ya wachezaji wapya yameamsha ari na matumaini mapya miongoni mwa mashabiki wa Azam FC, ambao sasa wanasubiri kwa hamu kuona ahadi hizo zikitekelezwa uwanjani.