Wakati klabu ya Yanga SC ikimtambulisha rasmi kocha wake mpya, Pedro Goncalves (mwenye umri wa miaka 49, raia wa Ureno) usiku wa kuamkia jana, Kaimu Kocha, Patrick Mabedi, amefichua siri iliyo nyuma ya ushindi wao muhimu dhidi ya Silver Strikers ya Malawi. Mabedi amesema ushindi huo kwa kiasi kikubwa unatokana na ufahamu wake wa kina kuhusu wachezaji wa timu hiyo ya Malawi.
Akizungumza mara baada ya kumalizika kwa mchezo wa marudiano wa raundi ya kwanza ya Ligi ya Mabingwa Afrika uliopigwa juzi jioni katika Uwanja wa Benjamin Mkapa, Dar es Salaam, Mabedi alieleza kwamba aliwahi kuwa kocha wa timu ya taifa ya Malawi. Kutokana na hilo, amewafundisha wachezaji wengi wa Silver Strikers, ambao asilimia kubwa ndio wanaounda kikosi cha kwanza cha timu hiyo.
"Wachezaji wengi wa Silver Strikers wanachezea timu ya taifa ya Malawi, mimi nilikuwa kocha wao, kwa hiyo nawafahamu sana," alisema Mabedi. Alifafanua kuwa faida hii kubwa iliwawezesha Yanga kupata ushindi wa mabao 2-0 na kutinga hatua ya makundi kwa jumla ya mabao 2-1, baada ya kufungwa 1-0 katika mchezo wa kwanza nchini Malawi.
Mabedi alieleza kuwa, kazi yake kubwa ilikuwa ni kuainisha aina ya uchezaji, tabia, mikimbio yao, uhatari na udhaifu wa kila mchezaji wa Silver Strikers. Kisha, alitumia ufahamu huo kuwafanyia kazi wachezaji wa Yanga, ambao waliweza kuwadhibiti wapinzani wao. "Kazi tuliyoifanya ni kuwadhibiti kwa kutumia faida ya kuwafahamu kwangu, nikawaambia wachezaji jinsi gani ya kucheza nao, na kweli mpango kazi umefanikiwa," alisisitiza Mabedi.
Yanga imefanikiwa kutinga hatua ya makundi ya Ligi ya Mabingwa Afrika kwa mara ya tatu mfululizo, ikiwa ni mara ya nne katika historia yao. Katika misimu iliyopita, timu hiyo iliishia hatua ya makundi mara mbili, huku msimu mmoja ikifika robo fainali na kutolewa kwa mikwaju ya penalti dhidi ya Mamelodi Sundowns ya Afrika Kusini.
Mabedi, ambaye aliongoza timu hiyo kama kaimu kocha mkuu baada ya kufukuzwa kwa Romain Folz, aliwashukuru wanachama na mashabiki kwa kujitokeza kwa wingi uwanjani, akisema sapoti yao ilikuwa na faida kubwa katika kufanikisha safari ya Yanga kutinga hatua ya makundi.
Kocha Mpya Aingia
Wakati Yanga ikisherehekea, kocha mpya Pedro Goncalves ametambulishwa rasmi. Pedro amewahi kufundisha klabu kama Sporting Lisbon, De Agosto na timu ya taifa ya Angola. Rekodi yake bora ni kuipeleka timu ya taifa ya Angola hatua ya robo fainali ya michuano ya AFCON iliyofanyika nchini Ivory Coast.