Visiwa vya Zanzibar vinatarajiwa kuwa kitovu cha soka barani Afrika kuanzia Agosti 5, mwaka huu, vitakapokuwa mwenyeji wa mechi za Kundi D la Michuano ya Mataifa ya Afrika kwa Wachezaji wa Ndani (CHAN), kundi ambalo tayari limebatizwa jina la "Kundi la Kifo." Vigogo wa soka barani, Senegal, Nigeria, DR Congo, na Sudan, watachuana vikali katika Uwanja wa kisasa wa New Amaan Complex.
Akizungumza na wanahabari jana visiwani humo, Waziri wa Habari, Vijana, Utamaduni na Michezo Zanzibar, Tabia Maulid Mwita, amesema Serikali ya Mapinduzi ya Zanzibar na Serikali ya Jamhuri ya Muungano wa Tanzania zimekamilisha maandalizi yote na wako tayari kwa asilimia mia moja kuikaribisha Afrika.
Waziri Tabia alithibitisha kuwa Shirikisho la Soka Afrika (CAF) limekagua Uwanja wa New Amaan Complex mara kadhaa na kuridhishwa na ubora wake, na kuthibitisha kuwa umekidhi vigezo vyote vya kimataifa vya kuchezewa mechi za hadhi ya juu.
"Miundombinu yote muhimu imekamilika. Sehemu za kufanyia mazoezi kwa timu, huduma za malazi, usafiri, ulinzi, na afya, vyote vimeandaliwa kwa kiwango cha kimataifa ili kuhakikisha wageni wetu wanapata huduma bora zaidi," alisema Waziri Tabia.
Aliongeza kuwa kuletwa kwa mashindano haya makubwa Zanzibar ni fursa ya kipekee ya kiuchumi na kijamii. Alisema itasaidia kukuza utalii, kuchochea biashara za ndani, na kutoa ajira za muda kwa vijana wengi.
"Zanzibar ipo tayari. Sio tu kwa ajili ya mechi za kusisimua za Kundi D, bali pia tuko tayari kuwapa wageni wetu wote uzoefu wa kipekee wa utamaduni na ukarimu wa Kizanzibari. Tunaitangaza nchi yetu kupitia michezo," alihitimisha.
Kamati maalum ya ndani iliyoundwa kuratibu mashindano hayo inaendelea kufanya kazi kwa karibu na maofisa wa CAF ili kuhakikisha kila kitu kinakwenda kama kilivyopangwa.