Mfalme wa mbio za marathon, Eliud Kipchoge, ametangaza nia yake ya kushiriki katika mbio za Sydney Marathon, zitakazofanyika jijini Sydney, Australia, mnamo tarehe 31 Agosti, 2025. Hii itakuwa ni mbio zake za pili za marathon kwa mwaka huu, baada ya kukimbia London Marathon nchini Uingereza, mnamo tarehe 27 Aprili.
Sydney Marathon imepata heshima kubwa kwa kuingizwa kwa mara ya kwanza katika Ligi ya Marathon Kuu Duniani (WMM), ambayo inajumuisha mbio kubwa na zenye ushindani mkubwa za kilomita 42 duniani. Ligi hii inajumuisha mbio za Tokyo Marathon (Machi 2), Boston Marathon (Aprili 21), London Marathon (Aprili 27), Berlin Marathon (Septemba 21), Chicago Marathon (Oktoba 12), na New York Marathon (Novemba 2).
Kipchoge, ambaye kwa sasa ana umri wa miaka 40, ameshinda marathon 11 katika ligi hiyo tangu aanze kushiriki mbio hizo mwaka 2013. Mbio za Sydney Marathon zilikuwa zimemshawishi kushiriki katika matoleo ya 2023 na 2024, lakini juhudi zao hazikuzaa matunda hadi sasa.
Katika taarifa yake kwa vyombo vya habari, Kipchoge alieleza kuwa anasubiri kwa hamu kubwa kushiriki mbio hizo, huku akisisitiza kuwa kila marathon inaleta changamoto mpya na ya kipekee.
"Ukimbiaji una uwezo wa kuunganisha watu. Ninasubiri kwa shauku kubwa kujiunga na jamii ya wakimbiaji nchini Australia, wakati taifa hilo na dunia nzima inaendelea kukumbatia ukuaji wa kasi wa mchezo huu," alisema Kipchoge.
Rais wa Shirikisho la Riadha la Australia, Jane Fleming, alimsifu Kipchoge na kusema kuwa ana nafasi kubwa katika historia ya wanariadha wakubwa duniani, sawa na wanariadha kama Usain Bolt, Muhammad Ali, Roger Federer, na Dawn Fraser.
Kipchoge anashikilia rekodi ya zamani ya dunia ya marathon ya saa 2:01:09, aliyoiweka jijini Berlin, Ujerumani, mwaka 2022. Hata hivyo, rekodi hiyo ilivunjwa na Kelvin Kiptum, ambaye alishinda Chicago Marathon 2023 kwa muda wa saa 2:00:35.
Katika London Marathon, Kipchoge atashindana na mabingwa wa marathon akiwemo Alex Mutiso (bingwa mtetezi), Sabastian Sawe, Timothy Kiplagat, Hillary Kipkoech, pamoja na Waethiopia Tamirat Tola, Kenenisa Bekele, na Milkesa Mengesha. Washindani wengine ni Jacob Kiplimo wa Uganda na Abdi Nageeye kutoka Uholanzi.
Kwa mara nyingine tena, Kipchoge anaonyesha nia yake ya kuthibitisha ubabe wake katika mbio za marathon, huku akitarajiwa kutoa ushindani mkubwa katika mbio za London na Sydney Marathon mwaka huu.