Wakati ulimwengu wa soka ukijiandaa na fainali za Kombe la Dunia 2026, pendekezo la kushangaza na ambalo halijawahi kutokea limetolewa: mechi ya fainali ianze saa tatu asubuhi (9:00 AM) kwa saa za Marekani. Pendekezo hili linakuja kama hatua ya dharura ya kuwalinda wachezaji, maafisa wa mchezo, na hata mashabiki dhidi ya wimbi la joto kali linaloikumba Marekani.
Profesa Mike Tipton, mtaalamu kutoka Chuo Kikuu cha Portsmouth nchini Uingereza anayechunguza athari za joto kali kwa mwili wa binadamu, amesisitiza kuwa hii ndiyo njia pekee salama na yenye mantiki. Kauli yake inatokana na hali halisi inayoonekana sasa nchini Marekani, ambapo wimbi la joto kali (heat dome) limesababisha joto kupanda hadi nyuzi 39 Selsiasi jijini New York, na kusababisha makumi ya watu kulazwa hospitalini.
Hali hii tayari imeleta changamoto kubwa katika mashindano ya Kombe la Dunia la Vilabu la mwaka 2025 yanayoendelea nchini humo. Kocha wa Borussia Dortmund, Niko Kovač, baada ya mchezo dhidi ya Mamelodi Sundowns ya Afrika Kusini, alisema "Ilikuwa joto kupita kiasi. Tulihisi kama tunacheza soka ndani ya sauna." Naye kocha wa Chelsea, Enzo Maresca, aliongeza kuwa, "Katika hali hii, haiwezekani kufanya mazoezi ya kawaida. Tulilazimika kufuta mazoezi ya mchana ili wachezaji wabaki na nguvu za kucheza mechi."
Kwa sasa, ratiba ya Kombe la Dunia 2026 bado haijatolewa, lakini inakadiriwa kuwa baadhi ya mechi zitachezwa saa sita mchana au saa tisa alasiri kwa saa za Marekani, muda ambao joto huwa la juu zaidi. Profesa Tipton anasema, "Kutoka mtazamo wa kisaikolojia na afya ya mwili, njia pekee ni kucheza mechi mapema iwezekanavyo. Ni lazima tuhamishe muda wa michezo kwa ajili ya afya za wachezaji, waamuzi na hata mashabiki."
Wadau wengine, kama vile Chama cha Wanasoka wa Kulipwa Duniani (FIFPRO), wameunga mkono hoja hiyo na kupendekeza hatua za ziada. Wamesema, "Afya na usalama wa wachezaji lazima vipewe kipaumbele kuliko maslahi ya kibiashara." FIFPRO inapendekeza muda wa mapumziko katikati ya mchezo (half-time) uongezwe hadi dakika 20, na mechi ziahirishwe kabisa iwapo kiwango cha joto na unyevunyevu (WBGT) kitazidi nyuzi 32.
Hii si mara ya kwanza kwa Kombe la Dunia nchini Marekani kukumbwa na joto. Katika fainali za mwaka 1994, baadhi ya mechi zilichezwa kwenye joto la nyuzi 38. Hata hivyo, kutokana na mabadiliko ya tabianchi, wataalamu wanatabiri kuwa Kombe la Dunia la 2026 litakuwa ndilo lenye joto kali zaidi kuwahi kutokea katika historia. Hivyo, FIFA inakabiliwa na shinikizo la kufanya maamuzi yasiyo ya kawaida ili kulinda ustawi wa mchezo wenyewe na washiriki wake.